Եմենում հիվանդանոցներ են ռմբակոծում

Սաուդյան Արաբիայի հրամանատարությամբ Եմենում ապստամբ հութիների դեմ ռազմական գործողություններ իրականացնող կոալիցիան Աբս քաղաքում հիվանդանոց է ռմբակոծել, հայտնում են «Բժիշկներ առանց սահմանի» կազմակերպությունից: Ինչպես փոխանցում է BBC-ն, հաղորդվում է, որ ավիահարվածի հետեւանքով վեց մարդ է զոհվել, եւս 20-ը վիրավորումներ են ստացել: Սա վերջին օրերի ընթացքում առաջին նման միջադեպը չէ: Մասնավորապես, «Բժիշկներ առանց սահմանի» կազմակերպությունից ահազանգել էին, որ կիրակի օրը Եմենի հյուսիսային Հայդան շրջանում ռմբակոծման էր ենթարկվել տեղի հիվանդանոցը, զոհվել էին 10 երեխաներ, վիրավորվել 28-ը: