Պուտինի նպատակը. The Times

The Times պարբերականն անդրադարձել է Սանկտ Պետերբուրգում օգոստոսի 9-ին կայացած Ռուսաստանի նախագահ Վլադիմիր Պուտինի և նրա թուրք գործընկեր Ռեջեփ Թայիփ Էրդողանի հանդիպմանը: Թերթը գրում է, որ այս համագործակցության մեջ Պուտինի գլխավոր նպատակն է Թուրքիայի և ՆԱՏՕ-ի միջև սեպ խրելը: Վերլուծելով Թուրքիայում հեղաշրջման տապալված փորձից հետո առաջ եկած զարգացումները՝ թերթը նշում է այն փաստը, որ արևմտյան առաջնորդները չկարողացան բավականաչափ արագ արձագանքել և իրենց աջակցությունը հայտնել Էրդողանին հուլիսի 15-ի իրադարձությունների ժամանակ, մինչդեռ Պուտինն այս հարցում իրենցից առաջ անցավ: Պարբերականի համաձայն՝  Էրդողանի՝ Կրեմլին հաճոյանալն ուղղված է հիմնականում Եվրոպայի կողմից ավելի մեծ հարգանք և աջակցություն շահելուն: «Անկասկած, սիրիացի գաղթականների հետ կապված ճգնաժամի պարագայում Եվրոպան զգալու է Թուրքիայի աջակցության կարիքը: Չմոռանանք նաև, որ Թուրքիան այն երկիրն է, առանց որի Եվրոպան չի կարող առաջ տանել «Իսլամական պետություն» ահաբեկչական խմբավորման դեմ պայքարը: Պետք է հաշվի առնենք, որ բոլոր այս համատեղ գործողություններում Թուրքիան առաջ է բերելու նաև իր նոր դաշնակից Ռուսաստանի ձայնը: Սակայն Թուրքիան այլևս չի կարող ունենալ արտոնյալ անդամի կարգավիճակ»,- ԹԵՐԹ.ամ-ի փոխանցմամբ՝ գրում է թերթը։ Թուրքիայի և Ռուսաստանի առաջնորդների հանդիպումն անցկացվել է օգոստոսի 9-ին՝ Սանկտ Պետերբուրգում գտնվող Ստրելնա բնակավայրի Կոնստանտինյան պալատում։ Սա նախագահների առաջին հանդիպումն է Մոսկվայի և Անկարայի միջև հարաբերություններում ծագած ճգնաժամից հետո, որի պատճառ է հանդիսացել 2015 թվականի նոյեմբերին թուրքական օդուժի կողմից ռուսական Су-24 ռմբակոծիչի խոցումը: