Սահակաշվիլին մեկնաբանել է Ղրիմում տիրող իրավիճակը
Վրաստանի նախկին նախագահ, ներկայում Ուկրաինայի Օդեսայի մարզի ղեկավար Միխայիլ Սահակաշվիլին սուտ է համարել Ռուսաստանի անվտանգության դաշնային ծառայության (ФСБ) տարածած տեղեկություններն այն մասին, թե Ղրիմում դիվերսիաներ են պատրաստվել: «ФСБ-ի վարկածը ստի պաշտոնական օրգանն է: Նրանք հույս ունեն, որ Արեւմուտքը թույլ կգտնվի, քանի որ Արեւմուտքը հակված է միջանկյալ դիրք գրավելուն: Ռուսաստանը ճիշտ չունի, նրանք կարծում են, որ կարող են ցանկացած սուտ վերածել ճշմարտության, ինչով եւ զբաղվում են, ուստի պետք չէ լրջորեն մեկնաբանել նրանց դիրքորոշումը»,- մասնավորապես, ըստ 112 Украина-ի, ասել է Սահակաշվիլին: Վերջինս նշել է նաեւ, որ չի կարծում, թե ռուս-ուկրաինական ներկա սրացումը կվերածվի լայնամասշտաբ ռազմական գործողության, սակայն կոչ է արել ուշադրություն դարձնել արեւմտյան գործընկերների դիրքորոշմանը, որպեսզի նրանք «չկոտրեն իրենց ճակատը»՝ ցուցաբերվող ճնշման տակ: Սահակաշվիլին Ուկրաինայում այժմ տեղի ունեցողը համեմատել է 2008-ի վրացական դեպքերի հետ, երբ Ռուսաստանը դիմում էր մտացածին բաների՝ քաղաքական նպատակների հասնելու համար:
Հետևեք մեզ Viber-ում
