Արայիկ Խանդոյանին օպտիկական ակնոցը վերադարձնելու հարցով դիմել են ՀՔԾ

« Բողոք եմ ներկայացրել Հատուկ քննչական ծառայություն, որպեսզի իմ  պաշտպանյալի օպտիկական ակնոցը հետ վերադարձնեն. Չեմ կարծում, որ այդ ակնոցն ինչ-որ քրեական տարր է պարունակում, որ այն առգրավվել են: Ես բողոքարկելու եմ, որպեսզի ակնոցը հետ վերադարձնեն, քանի որ նա առանց դրա չի կարողանում կարդալ այն, ինչ գրում են իր մասին», - Նուբարաշեն քրեակատարողական հիմնարկում լրագրողների հետ զրույցում ասաց Արայիկ Խանդոյանի պաշտպան Արա Ղարագյոզյանը: Նրա խոսքով՝ Արայիկ Խանդոյանի առողջական վիճակը լավ է, միայն ոտքն է վիրավոր, բայց Էրեբունի բժշկական կենտրոնից ամեն օր բժիշկներ են գալիս ու փոխում են վիրակապերը: «Ասում էր՝ կանգուն եմ, ինչպես մեր սարերը», - ասաց պաշտպանը: Արա Ղարագյոզյանը նշեց, որ, ճիշտ է, իրենց միջնորդությունից հետո «Դատապարտյալների հիվանդանոցում» պայմանները մի փոքր բարելավվել են, բայց խավարասերներ դեռ կան: Պաշտպանի խոսքով՝ օպտիկական ակնոցը վերադարձնելու հարցով իրենք դիմել են նաև Մարդու իրավունքների պաշտպանին: