Արցախի հրամանատարական կազմը, Արցախի բանակը ժողովրդի հետ է. Աշոտ Մանուչարյան
Ազատության հրապարակում ելույթ ունեցավ «Ղարաբաղ-88» շարժման անդամ Աշոտ Մանուչարյանը՝ հայտարարելով, որ այսօր կարեւոր օր է, քանի որ Ալեք Ենիգոմշյանն ազատության մեջ է` նշելով, որ նաև վաղը «Սասնա ծռեր» խմբի տղաներին հաց հասցրած Արթուր Սարգսյանի ծննդյան օրն է: «Արթուրը Սուրիկ Թամանյանի ղեկավարած ջոկատից է եղել: Լեոնիդ Ազգալդյանի հետ միասին ջոկատ էր ստեղծվել, որը հերոսական մարտեր է տարել Ղարաբաղյան պատերազմի ընթացքում: Արթուր Սարգսյանը ոչ միայն մարդ է, այլ նաև ազատամարտիկ: Պետք է պատասխան տան նրան ազատությունից զրկողները: Նա իր ծննդյան օրը պետք է լինի ոչ թե բանտում, այլ պարգևատրման վայրում, այսինքն՝ Ազատության հրապարակում, և պարգևատրվի ժողովրդի կողմից»,- ասաց Մանուչարյանը: Վերջինս կոչ արեց ազատ արձակել երկրի համար մեծ գործ կատարած տղաներին, քանի որ նրանց տեղը, ըստ վերջինս, ժողովրդի կողքին է: Մանուչարյանը տեղեկացրեց, որ երեկ ինքը հանդիպել է Արցախից Երևան ժամանակ հրամանատարների հետ, ովքեր եկել են ասելու՝ իրավիճակը, որը ստեղծվել է երկրում, պետք է լուծում ստանա: Ըստ նրա՝ Արցախի հրամանատարական կազմը, Արցախի բանակը ժողովրդի հետ է: Նրանք ասացին, որ ցանկացած անօրինականություն, որը լինի, իրենք պատրաստ են ժողովրդի հետ պայքարել դրա դեմ:
Հետևեք մեզ Viber-ում
