Պուտինի ձեռքերում

Եվրոպացի քաղաքական գործիչները խոսում են սիրիական հակամարտությանը միջամտելու անհրաժեշտության մասին, որպեսզի որևէ լուծում տրվի միգրացիոն ճգնաժամին, սակայն գործի չեն անցնում: Մինչդեռ հակամարտությունը Սիրիայում արդեն սրվել է, և քաղաքական լուծումը անհնարին է թվում: Корреспондент-ի փոխանցմամբ` այսպիսի կարծիք է հրապարակել գերմանական  Spiegel պարբերականը: «ԱՄՆ-ի և ԵՄ-ի ռազմավարությունը Սիրիայում այնպիսի տեսք ունի, ասես նրանք պարզապես հույս ունեն, որ իրավիճակն է՛լ ավելի չի բարդանա: Կամ էլ Արևմուտքը հույս ունի, որ հարևան Լիբանանը, Հորդանանը և Թուրքիան հոգ կտանեն փախստականների մասին», - ընդգծում է պարբերականը: Spiegel-ը սիրիական ճգնաժամի հաղթահարման երկու հնարավոր տարբերակ է առանձնացնում, որոնցից մեկում առաջարկվում է Ռուսաստանին գործելու լիակատար ազատություն տալ, որի պարագայում Սիրիայի նախագահ Բաշար ալ-Ասադը կպահպանի իր պաշտոնը, ինչին արևմտյան առաջնորդները համաձայն չեն: Երկրորդ տարբերակը ենթադրում է մեղմացնել ՌԴ-ի նկատմամբ պատժամիջոցները, պահպանել ռուսական ռազմաբազաները Լաթաքիայում և Տարտուսում, իսկ փոխարենը ՌԴ նախագահ Վլադիմիր Պուտինը պետք է համաձայնի Ասադի հեռացմանը, ինչին, իր հերթին, համաձայն չէ Մոսկվան: Ելնելով այս դատողություններից` պարբերականը ենթադրում է, որ հակամարտության կարգավորումն, ամեն դեպքում, առանց Պուտինի հնարավոր չէ: