«Ժողովուրդ» օրաթերթի խմբագիրը դատի է տվել Slaq.am-ին

«Ժողովուրդ» օրաթերթի և ArmLur.am էլեկտրոնային լրատվական կայքի գլխավոր խմբագիր Թագուհի Թովմասյանը դատի է տվել Slaq.am կայքի խմբագրությանը՝ պատվի, արժանապատվության և գործարար համբավի պաշտպանության պահանջով: Դատական տեղեկատվական համակարգից տեղեկանում ենք, որ հայցադիմումն ընդունվել է հուլիսի 21-ին: Ինչպես տեղեկանում ենք «Ժողովուրդ» օրաթերթի և ArmLur.am էլեկտրոնային լրատվական կայքի գլխավոր խմբագիր Թագուհի Թովմասյանի պաստասխանից, Slaq.am կայքը մեկ ամսվա մեջ ֆեյսբուքյան կեղծ օգտատերերի 3 գրառումներ է հրապարակել կայքում, խմբագիրը համարում է, որ դա ակնհայտ իր դեմ ուղղված նյութեր են: «Ակնհայտ ուղղորդված ձևով իմ` «Ժողովուրդ» օրաթերթի և Armlur.am էլեկտրոնային լրատվական կայքի գլխավոր խմբագիր Թագուհի Թովմասյանիս մասին ակնհայտ սուտ ու զրպարտություն պարունակող վիրավորական նյութեր եք հրապարակել: Ընդ որում, դրանք հրապարակել եք ոչ ձեր անունից, այլ օգտվել եք Ֆեյսբուքյան կեղծ օգտատերերի գրառումներից: Հատկանշական է նաև այն հանգամանքն, որ slaq.am կայքը գրանցված է «Վիրտուալ -Մեդիա» ՍՊԸ-ի անվամբ, որի հիմնադիրն է հանդիսանում Մենուա Հարությունյանը: Միտումն ակնհայտ է. ՀՀ Պաշտպանության նախարարի կնոջ` Ռուզաննա Խաչատրյանի հետ slaq.am-ի սեփականատեր Մենուա Հարությունյանի հանդիպումից կարճ ժամանակ հետո «ֆեյսբուքում» ստեղծվել է կեղծ էջեր, որոնք «Ժողովուրդ» օրաթերթի գլխավոր խմբագրիս վարկաբեկելու, սևացնելով անհաջող փորձեր են անում` այդպիսով ձգտելով հասարակության կողմից բազմիցս քննադատության արժանացած ՀՀ Պաշտպանության նախարար Սեյրան Օհանյանի և նրա կնոջը հաճոյանալ: Չեմ կարող ասել, թե կոնկրետ ինչ շահագրգռվածություն կա, բայց աներկբա է, որ իմ անբասիր կենսագրությունը վարկաբեկելու փորձեր են արվում ինչպես այլ անհասցե կայքերին, այնպես էլ slaq.am-ի միջոցով: Անշուշտ, չի ստացվի, բայց լռելն էլ սխալ է, ուստի պարտավոր եք հրապարակել ներկայացված պատասխանը: Պետք է վերջ տալ ֆեյք էջերի հետևում թաքնված գործունեությանը: Պարզ, շիտակ աշխատեք, եթե կարող եք: Եթե ոչ, զբաղվեք այն գործով, որը ձեր համար ավելի հոգեհարազատ է, դուք անարգում, ապականում եք լրատվական դաշտը».- գրել է խմբագիրը, ի դեպ, Slaq.am-ին ուղղված այս պատասխանը հրապարակվել է հենց այդ կայքում՝ «դատողությունները թողնելով հանրությանը»: Ի դեպ, նշենք, որ պաշտպանության նախարարությանը եւս մեծ ֆեյք օգտատերերի բանակ է պահում, այնպես որ զարմանալի չէ, որ նախարարության հասցեին հնչող քննադատությունները նման «հիվանդագին» արձագանքներ են ստանում: Նյութի աղբյուրը ` hraparak.am