Հերմինե Նաղդալյանը՝ «Սասնա ծռերի» անդամներին առաջադրված մեղադրանքների մասին

ՀՀ Նախագահի վերջին ելույթն իրավական գնահատական չի, այլ դրանում արտահայտված են նրա մտահոգությունն ու սրտացավությունը: Ինչպես հաղորդում է «Արմենպրես»-ը, նման հայտարարությամբ ՀՀԿ Գործադիր մարմնի նիստից հետո հանդես եկավ ՀՀ Աժ փոխնախագահ Հերմինե Նաղդալյանը՝ հավելելով, որ ԳՄ նիստի ժամանակ ևս Նախագահը վերահաստատել է, որ վերջին օրերի բռնության բոլոր դեպքեր մեկ առ մեկ քննվելու են: «Բոլոր անձինք, ովքեր ոչ իրավաչափ գործողություններ են կիրառել, անպայման պատժվելու են: Խնդիրներն իսկապես ունենալու են այն լուծումները, որոնք հանրությունն ակնկալում է: Որևէ մեկի նկատմամբ չհիմնավորված պատիժ կամ մեղադրանք չի լինելու: Բոլոր գործողությունները լինելու են օրենքի տառին և ոգուն համապատասխան»,- ընդգծեց Նաղդալյանը: Անդրադառնալով պաշտոնանկությունների հարցին՝ ՀՀ ԱԺ փոխնախագահն ընդգծեց, որ դրանց մասին հայտարարություններն արդեն իսկ պերճախոս էին: Նրա խոսքով՝ կուսակցության գործադիր մարմնի նիստում այլ պաշտոնանկությունների մասին հարցեր չեն քննարկվել: Հերմինե Նաղդալյանը խոսեց նաև ազգային համաձայնության կառավարության ձևավորման հնարավորության մասին՝ շեշտելով, որ դա ավելի լայն գաղափար է և կապված չէ պահի գործողությունների հետ, այլ այն գլոբալ բարեփոխումների, որոնք նախաձեռնվել էին սահմանադրական փոփոխությունների համատեքստում: «Բարեփոխումները բերել են նրան և ունեցել են այնպիսի գաղափարախոսություն, որ երկրի կառավարման գործընթացներում պետք է լինի ավելի մեծ ազգային համաձայնություն»,- ամփոփեց ՀՀ ԱԺ փոխնախագահը: