Սրտի և թոքի վիրահատություն է տարել. կալանավորված նախկին փոխնախարարը հերքում է
«Վահան Շիրխանյանը առողջության հետ կապված լուրջ խնդիր ունի: Կալանավորումը բավականին վատ է անդրադառնում նրա առողջական վիճակի վրա»,-այս մասին Հայելի.am-ի հետ զրույցում ասաց պաշտպանության նախկին փոխնախարարի պաշտպան Տիգրան Տեր-Եսայանը: Նշենք, որ Շիրխանյանը կալանավորվել է Նորք-Մարաշում վնասազերծված զինված խմբի հետ համագործակցելու մեղադրանքով: Տեղեկացնենք, որ ՀՀ վերաքննիչ քրեական դատարանն այսօր մերժել է Վահան Շիրխանյանի պաշտպաններ Տիգրան Տեր-Եսայանի ու Ստեփան Ոսկանյանի բողոքը՝ իրենց պաշտպանյալին կալանավորելու՝ Երևանի Կենտրոն և Նորք-Մարաշ ընդհանուր իրավասության դատարանի որոշման դեմ: Կողմը վերաքննիչ բողոքում բարձրացրել էր առաջին ատյանի դատարանի կողմից կալանավորումն ընտրելու, ինչպես նաև գրավ չկիրառելու օրինականության ու հիմնավորվածության հարցը: Վերաքննիչ դատարանում պաշտպանական կողմը, մասնավորապես, հայտնել է, որ ՀՀ քրեական դատավարության օրենսգրքով և Եվրոպական կոնվենցիայով ամրագրված՝ գրավի կիրառումը բացառող որևէ հիմք չի նշվել «Վահան Շիրխանյանը ըստ էության այս գործի հետ ոչ մի առնչություն չունի, քանի որ նա ընդամենը ծանոթ է եղել վնասազերծված զինված խմբի որոշ անդամների հետ: Ընդամենը զրուցել և այդ շրջանակներում շփվել են: Նա խմբի գաղափարների իդեոլոգը չի ու կտրականապես հերքում է իրեն առաջադրված մեղադրանքները»,-ընդգծեց պաշտպանը հավելելով, որ Շիրխանյանը բավականին պատկառելի տարիքում է և նման առողջական վիճակում գտնվելով հայտնվել է բարդ իրադրության մեջ: «Սրտի և թոքի վրահատություններ է տարել ու բանատային պայմանները ծանր են անդրադառնում նրա վրա»,-նկատեց Տիգրան Տեր-Եսայանը: Հիշեցնենք, որ նոյեմբերի 25-ին, ՀՀ Ազգային անվտանգության ծառայության և նույն ծառայության հակաահաբեկչական (Ալֆա) վարչության և Ոստիկանության կազմակերպված հանցավորության դեմ պայքարի գլխավոր վարչության աշխատակիցները, իրացնելով ստացված օպերատիվ տեղեկությունները, Երևանում կանխել են լուրջ և մեծ հանցագործություն: Նորք Մարաշ վարչական շրջանի 9-րդ փողոցի՝ սեփական տներից մեկում վնասազերծել են մինչ ատամները զինված մի քանի անձանց: Լուսինե Ղազարյան
Հետևեք մեզ Viber-ում
