Խոշոր ավտովթար Գեղարքունիքի մարզում

Այսօր` օգոստոսի 2-ին, խոշոր ավտովթար է տեղի ունեցել Գեղարքունիքի մարզում: Ժամը 16:20-ի սահմաններում Սևան-Մարտունի-Գետափ ավտոճանապարհի 20-րդ կմ հատվածում՝ Հայրավանք գյուղի վարչական տարածքում, բախվել են Գավառ քաղաքի Հացառատ թաղամասի բնակիչ, Սուրիկ Աստղիկյանի վարած Երազ մակնիշի 11 ՕԼ 325 համարանիշի և Գեղարքունիքի մարզի Լիճք գյուղի բնակիչ Արմեն Ենոքյանի վարած Mercedes մակնիշի 57 MԼ 557 համարանիշի ավտոմեքենաները: Ինչպես դեպքի վայրից հայտնում է ֆոտոլրագրող Գագիկ Շամշյանը, բախման հետևանքով Երազը դուրս է եկել երթևեկելի գոտուց, բախվել մի քանի ապառաժ քարերի և կողաշրջվել: Վթարի հետևանքով Երազի վարորդն ու նրա ուղևորը տեղափոխվել են Գավառի բժշկական կենտրոն: Վիրավորներին առաջինը օգնության են հասել քաղաքացիները և վթարի վայրի հարևանությամբ գործող Գեղամա հանգստատանը հանգստացող քաղաքացիները: Դեպքի վայր են ժամանել ճանապարհային ոստիկանության 2-րդ սպայական գումարտակի 4-րդ վաշտի աշխատակիցները՝ հետաքննիչ Բակուր Սարիբեկյանի գլխավորությամբ: Ժամանել է նաև Նաիրի Ինշուրանս ապահովագրական ընկերության ներկայացուցիչը: Ֆոտոլրագրողը հայտնում է, որ մեքենան մեծ դժվարությամբ դարձի բերեցին քաղաքացիները, որոնց մեջ մեծ մաս էին կազմում Հացառատ թաղամասի բնակիչները: Փաստի առթիվ Հայաստանի քննչական կոմիտեի Գեղարքունիքի մարզային քննչական վարչության Գավառի քննչական բաժնի ՀԿԳ ավագ քննիչ Թորգոմ Չանդոյանի կողմից, ով դեպքի վայրում ղեկավարում է քննչական աշխատանքները, նյութեր են նախապատրաստվում: Ֆոտոլրագրողը հայտնում է նաև, որ առաջին իսկ պահից վիրավորներին օգնելու մեջ է եղել նաև վարորդի փեսան, ով նաև իր ընկերների հետ կատարել է մեքենան դարձի բերելու և այն քարշակի վրա բարձրացնելու աշխատանքները: Օպերատիվ ժամանել է նաև ոստիկանության Գավառի բաժնի օպերատիվ խումբը՝ համայնքային ոստիկանության բաժանմունքի պետ Վարդան Ղազարյանի գլխավորությամբ: Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: