Եթե միայն մենք կանոնակարգված շնչենք ու արտաշնչենք, նման աճ տեղի կունենա.տնտեսագետ

ԱԺ ԲՀԿ-ական նախկին պատգամավոր տնտեսագետ Վարդան Բոստանջյանի կարծիքով` Իրանի նկատմամբ պատժամիջոցների կասեցումը Հայաստանի համար դրական երևույթ է: Այս մասին հրավիրված  ասուլիսին հայտնեց Բոստանջյանը: «Ելնելով այն իրողությունից, որ դարեր շարունակ Իրանը լուրջ, ինքնաբավ և հավասարակշռված քաղաքականություն վարող երկիր է եղել, իր պատմական անցքերում չեմ նկատել, որ հայկական պետությանը վնասներ պատճառած լինի: Այսօրվա դրությամբ էլ Իրանն իր հավասարակշռված քաղաքականության մեջ նայում է Հայաստանի հետ հարաբերությունների ընդհանուր հեռանկարին: Հայաստանը պետք է հստակ մոտեցումներ ցուցաբերի հետագա համագործակցության համար, դա մեզ համար չափազանց կարևոր է»,- նշեց տնտեսագետը: Տնտեսագետը ընդգծում է, որ Իրանն ահնահատկ շուկա է Հայաստանի համար: Բոստանջյանի խոսքով՝  Հայաստան-Իրան հարաբերությունների զարգացումները կունենան նպատակամետ միտում: Դրանից ելնելով  Իրանի հետ համագործակցության հարցում Հայաստանը շատ նուրբ քաղաքականություն պետք է իրականացնի. «Հասկանալի է, որ ռուսական ազդեցության տիրույթում ենք, և չեմ կարծում, որ Ռուսաստանը հրճվանքի մեջ կընկնի Հայաստանի՝ Իրանի հետ հարաբերությունների պայմաններում»: Վարդան Բոստանջյանը միաժամանակ ընդգծեց, որ տեսանելի ապագայում Ռուսաստանը լուռ համաձայնություն կտա Հայաստան-Իրան համագործակցության այն կետերին, որոնք ՀՀ-ն չեն հզորացնում.  «Այսինքն՝ ՀՀ-ն Իրանի հետ կարող է մինչև այն սահմանները համագործակցել, որոնց հետ կհամաձայնվի համագործակցել Ռուսաստանը»,- նշեց բանախոսը: Տնտեսագետի դիտարկմամբ ռուբլու տատանումները բացասաբար են անդրադառնում Հայաստանի տնտեսության վրա. «Այս պարագայում կոլապսային մի երևույթ է տիրում, որի մասին, ըստ էության, չեն էլ ուզում թաքցնել մինչև անգամ Ռուսաստանի իշխանություները: ՀՀ-ի ունեցած կապերը Ռուսաստանի հետ  85 տոկոս են կազմում, եթե Ռուսաստանում ոչ ցանկալի, խոցելի վիճակ է, ըստ էության, այդ նույնի հետ պրոեկտվում է նաև ՀՀ-ն»,- փաստեց տնտեսագետը: Վարդան Բոստանջյանի խոսքով՝ եթե անգամ մենք արհեստականորեն կարողանանք պահել արժույթի կայունությունը, հետագայում այն անպայման զգացնել կտա: «Առավել ևս բազմաթիվ երկրներում տարբեր արժույթներ գահավիժում են: Առհասարակ, արժույթն արտահայտում է տնտեսության իրավիճակը: Օրինակ` Ռուսաստանի պես երկրի պարագայում չեն կարողանում պահել այդ կայունությունը: Կոպիտ ասած՝ Ռուսաստանը նստած է նավթի ասեղի վրա»: Տնտեսագետի գնահատմամբ ՝ կանխատեսվող 2.2 տոկոս աճը շատ զուսպ տոկոս է. «Եթե միայն մենք կանոնակարգված շնչենք ու արտաշնչենք, նման աճ տեղի կունենա: Անկախ տնտեսական վայրիվերումներից, ես կարծում եմ, որ 2.2 տոկոս աճ ապահովելը հնարավոր է: Մեր ուժերը փոքր-ինչ մոբիլիզացնելու դեպքում որևէ խնդիր չի լինի: Եթե գոտիները ձգենք, մենք կարող էինք դրանից բարձր էլ աճ պատկերացնել»,-եզրափակեց Վարդան Բոստանջյանը: Աստղիկ Ավագյան