ԱՄՆ-ը զսպում է Պուտինին` Ղարաբաղում

Ռուսաստանի փոխարտգործնախարար Գրիգորի Կարասինը և Մոսկվայում ԱՄՆ դեսպան Ջոն Թեֆթի քննարկել են Սիրիայում և Ուկրաինայի հարավ-արևելքում տիրող իրավիճակը, ինչպես նաև ղարաբաղյան հակամարտության կարգավորման հեռանկարները: Այս մասին հայտնել է Ռուսաստանի ԱԳՆ-ն, որի հաղորդմամբ՝ հանդիպման նախաձեռնողը եղել է ամերիկյան կողմը, որի ընթացքում քննարկվել են նաև միջազգային օրակարգի այժմեական այլ հարցեր ևս: Միաժամանակ, ԵԱՀԿ Մինսկի խմբի ամերիկացի համանախագահ Ջեյմս Ուորլիքը լրատվամիջոցի հետ զրույցում հայտարարել է, որ ԵԱՀԿ Մինսկի խմբի համանախագահներն առաջընթաց են ակնկալում Հայաստանի ու Ադրբեջանի նախագահների հաջորդ հանդիպումից՝ կապված Ղարաբաղյան հակամարտության կարգավորման հետ: «Վիեննայի և Սանկտ Պետերբուրգի հանդիպումները իրենց դերն ունեցան շփման գծում և հայ-ադրբեջանական սահմանին լարվածության նվազեցման ու հարաբերական կայունության ապահովման հարցում:Նախագահների միջև ակնկալվող հանդիպումը պետք է ի ցույց դնի հրադադարի ռեժիմին հավատարիմ լինելու կողմերի ցանկությունը: Մենք նաև ակնկալում ենք, որ հաջորդ հանդիպումը կնպաստի բանակցության գործընթացում առաջընթացի ձեռքբերմանը: Մենք ակնկալում ենք, որ կողմերը հրադադարի ռեժիմը պահպանելու վերաբերյալ նախագահների հայտնած պատրաստակամության ֆոնին հավատարիմ կլինեն ստանձնած պարտավորություններին»,- նշել է ամերիկացի համանախագահը: Այսպիսով, ԵԱՀԿ Մինսկի խմբի համանախագահներն ակտիվորեն աշխատում են այն պարտավորությունների կատարման ուղղությամբ, որոնք նախագահները ստանձնել են Վիեննայում ու Սանկտ Պետերբուրգում՝ լարվածության նվազման ու հակամարտության խաղաղ կարգավորման շուրջ բանակցային գործընթացի հետագա առաջխաղացման համար: Սա մի կողմից հուսադրող է, քանի որ, եթե միջնորդներին հաջողվում է ընդհանուր հայտարարի գալ, պնդել բանակցությունների շարունակականության համար, իսկ սա իր հերթին նշանակում է, որ ռազմական հնարավոր գործողությունների արգելափակում: Ավելին, Ուորլիքն ասում է, որ Սերժ Սարգսյանն ու Իլհամ Ալիևը համաձայնության են եկել ղարաբաղյան շփման գծում ու հայ-ադրբեջանական սահմանին ԵԱՀԿ-ի մոնիթորինգային խմբի ընդլայնման մասին և ծրագրված է շարունակել հակամարտության կարգավորման վերաբերյալ մասշտաբային բանակցությունները՝ յուրաքանչյուր կողմի բարձրաստիճան պաշտոնյաների ներգրավմամբ: Կողմերի միջև լարվածության նվազեցման համար տարվող աշխատանքը, իհարկե, կարևոր է, սակայն ակնհայտ է նաև, որ ԵԱՀԿ Մինսկի խմբի ներսում Մոսկվայի ձգտումները` «ղեկն» իր ձեռքում պահել, չի հաջողվում, գոնե այս փուլում: Վաշինգթոնն այս փուլում բացահայտ հետաքրքրվածություն է ցուցաբերում ղարաբաղյան կարգավորման բանակցային գործընթացի առնչությամբ: Բանն այն է, որ ռուս-ադրբեջանական ռազմավարական գործընկերությունը, ինչպես նաև` ռուս-թուրքական ջերմացող հարաբերությունները ուղղակի սպառնալիք կարող են դառնալ Արցախի անվտանգության համար: Վաշինգտոնի ակտիվությունն ինչ-որ առումով կարծես փաստում է այն մասին, որ ԱՄՆ-ը ռուսական ջանքերին, կարծես, չի վստահում, և գոնե պաշտոնապես ցույց է տալիս, որ ձգտում է տիրապետել բոլոր մանրամասներին, որոնք կապված են Մոսկվայի նախաձեռնողական քայլերի հետ: Սարգսյան-Ալիև հաջորդ հանդիպումը, որն ակնկալվում է օգոստոսին անցկացնել, հնարավոր է տեղի ունենա Պուտինի հովանու ներքո, և մինչ այդ, փաստացի, ամերիկյան կողմը Մոսկվայից թափանցիկություն է պահանջում: Մետաքսյա Շալունց