Որտեղ են զինված խմբավորման անդամները և ինչ կարգավիճակում

15 օր շարունակ ողջ Հայաստանն ու աշխարհասփյուռ հայությունը կարդում, խոսում, ապրում էր զինված խմբավորման գործողություններով: Որտե՞ղ և ի՞նչ իրավիճակում են գտնվում նրանք այժմ: ՊՊԾ գնդից առաջինը վիրավոր վիճակում դուրս բերվեց Թաթուլ Թամրազյանը: 26-ամյա երիտասարդը որովայնի ձախ կեսի հրազենային վիրավորում ունի, դեռ գտնվում է Էրեբունի բժշկական կենտրոնում: 9 օր անց արդեն՝ Հովհաննես Հարությունյանն ու Աշոտ Պետրոսյանը: 30-ամյա Հովհաննես Հարությունյանն աջ ազդրոսկրի ու աջ սրունքի հրազենային վիրավորում ունի, նրան վիրահատել էին, 2 օր անց տեղափոխել «Դատապարտյալների հիվանդանոց»: Նրան մեղադրանք է առաջադրվել ՀՀ Քրեական օրենսգրքի 219-րդ հոդված 3-րդ մասի 1-ին կետով (Կազմակերպված խմբի կողմից՝ շենքեր, շինություններ, տրանսպորտի, հաղորդակցության կամ կապի միջոցներ զավթելը) և 235-րդ հոդվածի 3-րդ մասով (կազմակերպված խմբի կողմից՝ ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը), կալանավորված է: Մասնագիտությամբ նկարիչ 50-ամյա Աշոտ Պետրոսյանի երկու ոտքերն էին հրազենային վիրավորումից տուժել, նա նաև աջ ազդրոսկրի կոտրվածք ունի: Աշոտ Պետրոսյանը նույնպես գտնվում է «Դատապարտյալների հիվանդանոցում», կալանավորված է: Պավել Մանուկյանն ու իր որդին՝ Արամ Մանուկյանը ՊՊԾ գնդից դուրս բերվեցին ևս վիրավոր վիճակում: Թեպետ պաշտոնապես հայտարարեցին, թե փոխհրաձգության պատճառով են հայր ու որդի վիրավորում ստացել, սակայն հետո տեղեկություններ տարածվեցին, որ Պավել Մանուկյանին վիրավոր ընկերոջը հանձնելու ժամանակ են վիրավորել, որդին էլ հորն օգնության է հասել և նույնպես վիրավորում ստացել: Պավել Մանուկյանը, ով գտնվում է հացադուլի մեջ, ստացել է զույգ ազդրերի հրազենային վնասվածքով, աջ ազդրի բազմաբեկոր կոտրվածք, Արամ Մանուկյանն էլ՝ ձախ ազդրի վերին երրորդականի հրազենային վնասվածք: Հայր ու որդի Մանուկյաններից ՊՊԾ գնդից դուրս բերելիս օգնել էին Գագիկ Եղիազարյանն ու Արամ Հակոբյանը, նրանց ձերբակալեցին, ապա կալանավորեցին` ներկայացնելով, թե խմբավորման երկու անդամները հանձնվել են: Խմբավորման այս 4 անդամներն էլ այս պահին մեղադրյալ են, կալանավորված ու գտնվում են «Դատապարտյալների հիվանդանոցում»: Ի դեպ, «հանձնվելիս», փաստաբանի խոսքերով, երկու պաշտպանյալն էլ՝ Գագիկ Եղիազարյանը և Արամ Հակոբյանը, բռնության են ենթարկվել: Էդվարդ Գրիգորյանն այն երիտասարդն է, որին ոչ մի հիվանդանոցում դեռ չեն գտել, նա հրազենային վիրավորում էր ստացել և տեղափոխվել նախնական տեղեկություններով Մասիվի հիվանդանոց: Էդվարդ Գրիգորյանի գտնվելու մասին մինչև այժմ էլ տեղեկություններ չկան, մամուլում չի գրվել: Նշենք, որ նրան դուրս էին բերել գնդից հուլիսի 29-ին: Հուլիսի 29-ին էլ ՊՊԾ գնդում վիրավորվել և Էրեբունի բժշկական կենտրոն են տեղափոխվելԱրթուր Մելքոնյանը և Արմեն Լամբարյանը: Արթուր Մելքոնյանն ունի երկու ազդրի մանր բեկորային վնասվածքներ, որոնք վիրահատություններ չեն պահանջում, իսկ Արմեն Լամբարյանն ուներ ձախ ազդրի բեկորային հրազենային վնասվածք, փափուկ հյուսվածքների վնասումով, նրան վիրահատեցին: Որոշ ժամանակ անց ոստիկանությունը մի տեսանյութ ներկայացրեց, թե ինչպես է Արթուր Մելքոնյանը պատմում ՊՊԾ գնդի վրա իրենց գրոհը, Արթուր Մելքոնյանը պատմել է, որ չի իմացել, թե ուր է գնում, սակայն այս տեսանյութը տարբեր մեկնաբանությունների եւ կասկածների տեղիք տվեց: Արթուր Մելքոնյանը նույնպես տեղափոխվել է «Դատապարտյալների հիվանդանոց»: Հուլիսի 31-ին էլ 9.30-ի սահմաններում ՊՊԾ գնդի տարածքից հրազենային վնասվածքով հիվանդանոց տեղափոխվեց Սեդրակ Նազարյանը: Վերջինս կրծքավանդակի աջ կողմի թափածակող հրազենային վնասվածք է ստացել և վիրահատվել: Նրան դեռ չեն տեղափոխել «Դատապարտյալների հիվանդանոց»:   Արմեն Բիլյան, Վարուժան Ավետիսյան, Մխիթար Ավետիսյան, Թորոս Թորոսյան, Վարդան Գերավետյան, Գևորկ Իրիցյան, Արայիկ Խանդոյան, ով նույնպես վիրավորոմ ունի, Սերգեյ Կյուրեղյան, Արեգ Կյուրեղյան, Մարտիրոս Հակոբյան, Արթուր Սողոմոնյան, Հովհաննես Վարդանյան, Ռուբեն Գրիգորյան, Արայիկ Հակոբյան, Էդգար Սողոմոնյան, Գևորգ Մելքոնյան, Գառնիկ Հովակիմյան, Տիգրան Սարգսյան.սրանք այն անձանց անուններն են, որոնք 15-օրյա պայքարից հետո վայր դրեցին զենքերը, սակայն նշելով, որ պայքարը չի ավարտվել. «Մեր միսիան այնտեղ ավարտվում է»: Նրանք ձերբակալված են, ԱԱԾ-ն նրանց որակում է ահաբեկիչներ, իսկ զինյալները իրենց համարում են ռազմագերիներ: iravunk.com