Իրանը Airbus-ի հետ կկնքի 114 ինքնաթիռների գնման պայմանագիր

Հաջորդ շաբաթ Իրանի Իսլամական Հանրապետության նախագահ Հասան Ռուհանիի՝ Փարիզ այցելության ժամանակ նախատեսվում է Airbus ընկերության հետ ստորագրել 114 ինքնաթիռների գնման պայմանագիր: Այս մասին կիրակի օրը հայտնել է Իրանի տրանսպորտի և քաղաքային զարգացման նախարար Աբբաս Ահունդին՝ գրում է tass.ru-ն: «Մենք 10 ամիս շարունակ բանակցություններ ենք վարել»,- նշել է նախարարը: Այն մասին, որ պատժամիջոցների չեղարկումից հետո Airbus-ի ինքնաթիռները կհամալրեն Իրանի ամենախոշոր՝ Iran Air ավիափոխադրող ընկերության պարկը, հայտնի դարձավ հունվարի 16-ին: Ավելի վաղ Իրանի քաղաքացիական ավիացիայի կազմակերպությունը բազմիցս է հայտարարել, որ մոտակա 10 տարում երկիրը մինչև 500 ուղևորատար ինքնաթիռներ ձեռք բերելու կարիք ունի: Այսօրվա վիճակով երկիրն ունի 140 քաղաքացիական ինքնաթիռ, որոնք արդիականացման և վերանորոգման կարիք ունեն: Իրանի նախագահ Հասան Ռուհանին հունվարի 25-27-ը պաշտոնական այցով կմեկնի Ֆրանսիա և Իտալիա՝ Եվրոպայի երկրների հետ տնտեսական կապերը զարգացնելու նպատակով: