Թե՛ լրագրողների, թե՛ ցուցարարաների դեմ բռնությունները եղել են նախօրոք ծրագրավորված

Մամուլի ազգային ակւմբը հայտարարությամբ է հանդես եկել՝ դատապարտելով վերջին օրերին լրագրողների նկատմամբ իրականացված բռնության դեպքերը: Մամուլի ազգային ակումբը խոր վրդովմունքով խստորեն դատապարտում է  հուլիսի 29-ի ուշ երեկոյան Երևանում ՀՀ ոստիկանության՝ լրագրողների դեմ իրականացրած  բռնությունները: Արձանագրելով, որ -       լրագրողների դեմ բռնությունները նպատակաուղղված էին կանխելու ոստիկանների կողմից  ՀՀ քաղաքացիների նկատմամբ իրականացված անօրեն վայրագությունների մասին տեղեկատվության տարածումը և դրանց հանրայանցումը; Վկայակոչելով՝ -       բռնությունների ենթարկված ԶԼՄ-ների լրագրողների (A1+, 1.in.am, «Ազատություն» ռադիոկայան,  news.am, «Արմենիա» հեռուստաընկերություն և այլն) տեսանյութերը և հրապարակումներն առ այն, որ ոստիկանների և քաղաքացիական հագուստով անձանց կողմից իրականացված բռնությունները եղել են ուղղորդված; Մամուլի ազգային ակումբը հայտարարում է, որ - թե՛ լրագրողների, թե՛ ցուցարարաների դեմ բռնությունները եղել են նպատակաուղղված և նախօրոք ծրագրավորված: Մամուլի ազգային ակումբը վստահություն չի տածում իրավապահ մարմինների հավաստիացումների հանդեպ, թե նման վայրագությունները կատարողները պատասխանատվություն կկրեն. նախորդ փորձերը ցույց են տվել, որ հասարակության և լրագրողների նկատմամբ ոստիկանների կազմակերպած հանցավոր բռնությունները երբևէ չեն պատժվել։ Մամուլի ազգային ակումբն իր զորակացությունն է հայտնում Հայաստանում ստեղծված գերբարդ ներքաղաքական իրավիճակում իրենց մասնագիտական գործունեությունը խիզախորեն իրականացնող այն լրագրողներին, ովքեր հավատարիմ են մասնագիտական սկզբունքներին և իրենց գործունեությունն իրականցնում են ի շահ հասարակության՝ տեղեկացնելով Հայաստանի, միջազգային հանրությանը և Սփյուռքին Հայաստանում իրականացվող վայրագությունների մասին՝ դրանով իսկ  ի ցույց դնելով  ՀՀ իշխանությունների գործունեության մեթոդները, գործելակերպն ու դեմքը: Մամուլի ազգային ակումբը դիմում է՝ -       խոսքի և մամուլի ազատության հարցերով նախանձախնդիր միջազգային բոլոր կազմակերպություններին, Հայաստանում հավատարմագրված օտարերկյա դեսպանություններին՝ կոչ անելով նրանց վրդովմունքի ձայն բարձրացնել  լրագրողների և խաղաղ ցուցարարների դեմ իրականացվող բռնարարքների դեմ և հանդես գալ ի պաշտպանություն Հայաստանում ժողովրդավարական ազատությունների և մարդու իրավունքների: Մամուլի ազգային  ակումբ 31.07.2016 թ.