ՊՊԾ գնդի տարածքից ազատ արձակված բուժակը չի ցանկանում խոսել. ձայնագրություն
19:50 ՀՀ ոստիկանության պարեկապահակային ծառայության գնդի տարածքից ազատ արձակված 23-ամյա բուժակ Դավիթ Տոնոյանը հրաժարվում է խոսել: Երեկ մեր թղթակիցն այցելել է նրա բնակարան՝ փորձելու պարզել, թե ինչպես է իրեն զգում, ինչի՞ է ականատես եղել ՊՊԾ գնդի տարածքում: Բնակարանի դուռը բացելով՝ մեր թղթակցին ասել են, որ Դավիթը տանը չէ, գնացել է Լեռնային Ղարաբաղի զորամասերից մեկում իր ծառայությունն իրականացնող եղբոր՝ Հայկի մոտ: Հարցին, թե ինչպես էր իրեն զգում, ինչ է պատմել Դավիթը՝ նրանց տանն այդ պահին գտնվող Օնիկ անունով երիտասարդը պատասխանել է, որ Դավիթն իրեն լավ է զգում, սակայն չի ուզում խոսել: «Մեզ բառ անգամ չի պատմել, որովհետեւ եկել է ու պառկել է քնելու, առավոտյան էլ արթնացել ու հոր հետ գնացել է առեւտուր անելու, որ էսօր երեկոյան գնա եղբոր մոտ»,- նկատել է նա: Դավիթ Տոնոյանը երեկ աշխատանքի չէր: «Շտապբուժօգնություն» ՓԲԸ տնօրեն Թագուհի Ստեփանյանը մեր թղթակցի հարցին ի պատասխան ասել է, որ նա մի քանի օրը մեկ է աշխատանքի լինում, իսկ այսօր (երեկ) նրա հերթը չէ: Ստեփանյանն ասել է, որ ինքը խոսել է Դավիթի հետ, սակայն մանրամասներ չի պարզել. «Սթրեսի մեջ է, իր մոտ լուրջ վիճակ է»,- նկատել է նա եւ հավելել, որ հավանաբար դրանով է պայմանավորված Դավիթին ազատ արձակելը:
Հետևեք մեզ Viber-ում
