ՊՊԾ գնդում գտնվող բուժաշխատողներին սնունդ են փոխանցել

22:29 Արդեն երկրորդ օրն է՝ շտապօգնության 3 աշխատակիցներ (բժիշկներ Նորայր Թեւանյանը, Սալվադոր Խեչոյանը, բուժքույր Մալինա Մարգարյանը) գտնվում են ոստիկանության պարեկապահակային գնդի տարածքում: Այսօր «Շտապբուժօգնություն» ՓԲԸ-ի տնօրեն Թագուհի Ստեփանյանը աշխատանքային ներքին հեռախոսակապով կապ է հաստատել բժիշկներից Սալվադոր Խեչոյանի հետ, սնունդ եւ դեղորաք փոխանցել: Մեր հարցին, թե ինչպես են բուժաշխատողներն իրենց զգում՝ Ստեփանյանը պատասխանեց. «Մի 3 ժամ առաջ եմ խոսել, լավ են, երեւի հոգնած են ուղղակի, որովհետեւ երկրորդ սուտկան է սկսվում, որ այնտեղ են»: Մեր հարցին՝ սնունդը միայն բուժաշխատողների համա՞ր է փոխանցվել՝ «Շտապօգնության» տնօրենը դրական պատասխան տվեց՝ ընդգծելով, որ «Սասնա ծռեր» խմբի անդամներն իրենցից սնունդ չեն ուզում: «Հնարավո՞ր է «Սասնա ծռերը» համաձայնեն ներսում եղած բուժաշխատողներին դուրս թողնել, եթե նոր խումբ գնա այնտեղ» հարցին Ստեփանյանը պատասխանեց. «Մենք ի՞նչ երաշխիք ունենք, որ հաջորդ  հերթափոխի անդամներին էլ չեն պահի այնտեղ, կամ նրանց բաց կթողնեն: Մենք երբ կանչ ստացանք, ասացին, որ ծանր վիրավորներին պետք է տեղափոխենք հիվանդանոց: Այդ պայմանը չկատարվեց, վիրավորներին պահեցին իրենց մոտ: Հիմա մենք ի՞նչ երաշխիք ունենք, որ բուժաշխատողներին կթողնեն: Կամ հե՞շտ է մարդկանց համոզել, ասել՝ գնացեք, հերթապահեք այնտեղ եւ հայտնի չէ ինչքան ժամանակով»: Խոսելով գնդի տարածքում գտնվող վիրավորների մասին՝ Ստեփանյանն ասաց, որ նրանցից մեկը վիրահատության կարիք ունի, գնդակը ոտքի մեջ է: Մյուս վիրավորի վնասվածքը գոտկատեղի հատվածում է. վնասվածքը դարձյալ հրազենային է, բայց մարմնում փամփուշտ չկա: armtimes.com