«Միացում»՝ հորդառատ անձրևի տակ

21.50 Երթի մասնակիցները հորդառատ անձրևի տակ «միացում» վանկարկելով առաջ են քայլում: Երթն առաջնորդում է Արմեն Մարտիրոսյանը: Սակայն նրանք մինչ Բաղրամյան փողոց գնալը Մարտիրոսյանի հորդորով Ֆրանսիայի հրապարակում կանգ առան: Արմեն Մարտիրոսյանն ասաց, որ ինքը չի ասել գնում ենք  Բաղրամյան պողոտա, այլ ասել է, որ գնում ենք դեպի Բաղրամյան պողոտա և  նշեց, որ հենց Ֆրանսիայի հրապարակում էլ կմնան՝ խաղաղ անհնազանդության հայտնելով: «Ֆրանսիայի հրապարակը տրանսպորտային կարևոր հանգուցային կետ է, լավ կետ է, անհնազանդություն հայտնելու վայր է»,-ասաց նա: «Արձագանք» խմբի անդամ, «Հակաճգնաժամային նախաձեռնող խորհրդի» անդամ Եղիշե Պետրոսյանն Ազատության հրապարակի հարթակից հայտարարեց, թե իրենց ուզածն է, որ երկիրը բռնի նոր ճանապարհ: «Մենք փոփոխություն ենք ուզում, նորմալ երկիր ենք ուզում, որտեղ մենք կարող ենք աշխատել, ստեղծագործել, բուժվել, հյուր ընդունել, հյուր գնալ, այսինքն՝ մարդավարի ապրելու կարիք ունենք, բայց դա մենք ուզում ենք մեր երկրի համար: Այսինքն՝ ամեն ջանք պետք է գործադրենք, որ ի կատար ածենք»,-ասաց նա և հայտարարեց, թե կոչ են անում համայնքներում քաղաքացիներն իրենց տեղերում կազմակերպեն քաղաքացիական հավաքներ, որ շարժմանն աջակցեն: «Եթե հանկարծ այնպես ստացվի, որ այս շարժումն էլ կարողանա տապալել, նշանակում է 50 տարի էլ հետ կընկնենք,  մենք այդ ժամանակը չունենք, այդ ռեսուրսը չունենք։  Պետք  է կոնկրետ գործողություններ անենք, համայնքների խմբեր ձևավորենք»,-ասաց նա: