Ծննդկանի մահվան հերթական դեպքը «Սլավմեդ» բժշկական կենտրոնում

«Սլավմեդ» բժշկական կենտրոնից ծանր վիճակով «Արմենիա» ԲԿ տեղափոխված ծննդկան է մահացել: Մեզ հասած հավաստի տեղեկությունների համաձայն` կեսարյան հատում է եղել, ծննդկանը մեկ օր մնացել է «Սլավմեդում»: Հաջորդ օրը կինն արնահոսել է, ինչը, ըստ նախնական տվյալների, չեն նկատել: Միայն այն ժամանակ, երբ նա ուշագնաց է եղել, ստիպված են եղել «Արմենիա» ԲԿ տեղափոխել: Այստեղ, ցավոք, ծննդկանի կյանքը փրկել չի հաջողվել: Ասել է, թե կինն արնաքամ է եղել: Armlur.am-ի հետ զրույցում «Սլավմեդ»-ից հրաժարվեցին որևէ մանրամասն ներկայացնել` փոխանցելով միայն փորձաքննություն է անցկացվում: Այդուհանդերձ, մեզ տեղեկություններ են հասել այն մասին, որ նշանակված փորձաքննությունը, մասնավորապես, վերաբերում է հենց «Սլավմեդ» բժշկական կենտրոնում տիրող վիճակին: Ինչպես հայտնի է, սա առաջին դեպքը չէ, որ այս բուժհաստատությունում նման դեպք է գրանցվում: Մեծ աղմուկ էր բարձրացել ապրիլի 28-ին 37-ամյա ծննդկանի մահվան դեպքը: Այս տեղեկությունը փորձեցինք ճշտել Առողջապահության նախարարությունից: Այստեղից մեր հարցմանն ի պատասխան հայտնեցին, որ նախարարի հանձնարարականով մասնագիտական հանձնաժողով է ստեղծվել: Հանձնարարվել է մայրական մահացության դեպքը ենթարկել մասնագիտական վերլուծության: Խիստ հանձնարարակներ են տրվել` մանրամասն և հանգամանալից ուսումնասիրելու բժշկան օգնության ցուցաբերելու կարգ: Կայքի տեղեկություններով` նշանակվել է նաև դատաբժշկական փորձաքննություն: