Սիրո պահանջը և Սուրբ Սարգիսը` հովանավոր

«Աստծո մեծագույն սիրո ներմուծումը մեր կյանք մի տեսակ մեծագույն պահանջարկ ունի»,-Հայելի.am-ի թղթակցի հետ զրույցում ասաց ԱՀԹ Նոր Նորքի Աստվածածին եկեղեցու հոգևոր հովիվ Տեր Նշան քահանա Ալավերդյանը: Քահանան Սեր և Աստծո հանդեպ մեծագույն հավատի խառնուրդ է փորձում մատուցել մարդկանց: Նշենք, որ Ամենայն Հայոց Գարեգին Բ հայրապետի տնօրինությամբ Ս. Սարգիս զորավարի տոնը հռչակվել է Երիտասարդների օրհնության օր: Այս տարի այն նշվում է հունվարի 23-ին: Ս. Սարգիս զորավարը իր որդու` Մարտիրոսի և 14 քաջ մարտիկների հետ նահատակվել է հանուն քրիստոնեական հավատքի: «Սրանով  է պայմանավորված, որ հասարակության ամենատարբեր խավերը, Սուրբ Սարգսի իմաստը տարբեր կերպ մեկնաբանելով, փորձում են նաև կենցաղավարության մեջ իրոք որպես տոն բերել: Եվ քանի որ զինվորական է Սուրբ Սարգիսը և իր հետ նահատակված 14 նահատակներին կարող ենք ասոցացնել մեր երիտասարդ զինվորներ հետ, որոնք պատրաստ են գաղափարի համար կայնք տալ, ուրիշի համար նահատակության են պատրաստ: Այս միտքը նաև Քրիստոս է ասում, որ ամենամեծ նահատակությունը սեփական անձը նահատակել կարողանալն է»,- նշեց Տեր Նշանը: Տեր Նշանը մեկնաբանեց, որ երիտասարդների մոտ այս տոնը միշտ էլ այլ մեկնաբանություն է ունեցել: «Հայ Առաքելական եկեղեցին Սուրբ Սարգսի տոնին նշում է ոչ միայն երիտասարդների սիրո Բարեխոս Սուրբ Սարգսի տոնը, այլ նաև սիրո բարեխոսության տոնն առհասարակ: Եվ շեշտադրել, որ Սուրբ Սարգիսը միայն երիտասարդների տոնն է, սխալ է, քանի որ սա առհասարակ սիրո բարեխոսության տոն է»: Տեր Հայրը շեշտեց նաև, որ Սուրբ Սարգսին աղաբլիթ ուտելու մեջ գուշակային ու սատանայապաշտական տարրեր կան: Ըստ հոգևորականի` պետք է շեշտադրել ոչ թե աղի բլիթ ուտելու և երազում երկրպագուին տեսնելու գաղափարը, այլ Աստծուց սիրո բարախեսությունը խնդրելու գաղափարը: Նշենք, որ տոնի հիշատակելի սովորություններից է փոխինդով մատուցարանը դնել տան տանիքին կամ պատշգամբին եւ սպասել Ս. Սարգիս զորավարի ձիու պայտի հետքին: Ըստ ավանդույթի` Ս. Սարգիսը պետք է հրեշտակների ուղեկցությամբ անցնի եւ ում մատուցարանի մեջ դրված ալյուրի կամ փոխինդի մեջ թողնի իր սպիտակ (մաքրություն, անաղարտություն է խորհրդանշում) ձիու պայտի հետքը, այդ տարի կիրականանա երիտասարդի երազանքը: Սիրահարված երիտասարդները տոնի առթիվ միմյանց բացիկներ եւ քաղցրավենիք են նվիրում: Լուսինե Ղազարյան