Իսկ Մաշային կոպտելու «դուխ» չկա՞

Թուրքիայի արտաքին գործերի նախարար Մևլութ Չավուշօղլուն երկրում կատարված ռազմական հեղաշրջման անհաջող փորձից հետո հրավիրված առաջին ասուլիսում ինչպես հայտնի է, խոսել է Հայաստանի և Ադրբեջանի միջև խաղաղության հաստատման մասին: Ըստ թուրքական Anadolu պետական լրատվական գործակալության` Չավուշօղլուն հայտարարել է, որ իր բնորոշմամբ գյուլենականների հրահրած հեղաշրջման փորձից առաջ Ադրբեջան կատարած այցի գլխավոր թեմաներից մեկը եղել է Հայաստանի և Ադրբեջանի միջև խաղաղության հաստատման խնդիրը: Թուրք բարձրաստիճան դիվանագետը շեշտել է, որ այս թեմայով հանդիպումներ է ունեցել Ադրբեջանում` ավելացնելով սակայն, որ Հայաստանի հետ որևէ շփում չի ունեցել: Թուրք նախարարը չի զլացել ևս մեկ անգամ հիշեցնել Ադրբեջանին ցուցաբերվող Թուրքիայի աջակցության մասին: Ահա նա ընդգծել է, որ Բաքու կատարած վերջին այցի ժամանակ փորձել է ճշգրտել այդ հարցում Ադրբեջանի դիրքորոշումն ու արձագանքը: Երբ նրանից փորձել էին ճշգրտել, թե ինչ նկատի ունի նախարարը, նա չի մանրամասնել իր խոսքերը: Թուրքական մամուլն այս օրերին գրում էր` դիվանագետներին հղում անելով, թե Թուրքիայի իշխանությունները ձգտում են նվազեցնել թշնամիների թիվը և մեծացնել ընկերների թիվը, ունեն Հայաստանի հետ սահմանը բացելու պլան: Պաշտոնական Երևանը պատասխանել է Թուրքիայի իշխանությունների հայտարարություններին: Հայաստանի և Ադրբեջանի միջև խաղաղության հաստատման գործում Թուրքիայի մասնակցությանն անդրադառնալով՝ ՀՀ ԱԳՆ մամուլի խոսնակ Տիգրան Բալայանը PanARMENIAN.Net-ի հետ զրույցում նշել է, որ Հայաստանը Ադրբեջանի հետ հարաբերությունների հարցում Թուրքիայի միջամտության կարիքը չունի: Նրա խոսքով, եթե Թուրքիան ցանկանում է այդ հարցում օգտակար լինել, «ապա պետք է հեռու մնա»: Պաշտոնական Երևանի արձագանքը կարելի է, իհարկե, տրամաբանական համարել: Թուրքիային «տեղը դնելու» հարցում մեր իշխանավորները, ինչպես ասում են, խնդիր չունեն: Մշտապես ասելիք կա, հիշեցնում են, որ որքան ապակառուցողական դեր է խաղում Անկարան, Հայաստան-Թուրքիա սահմանը փակել է` Ղարաբաղի խնդրի պատճառով: Հարկ եղած դեպքում հրապարակային ամեն ինչ ասվում է: Բայց ինչպե՞ս հասկանալ պաշտոնական Երևանի, իսկ ավելի կոնկրետ` Հայաստանի ԱԳՆ-ի, նրա ղեկավար Էդվարդ Նալբանդյանի և նրա աշխատակիցների լռությունը, երբ պաշտոնական Մոսկվան է խոսում Թուրքիայի «կառուցողական ներդրման» մասին Ղարաբաղյան հակամարտության խնդրով: Չէ՞ որ Թուրքիայի արտգործնախարարի հայտարարություններից մի քանի օր առաջ` անցյալ շաբաթ պաշտոնական Մոսկվան է խոսել ղարաբաղյան կարգավորման գործընթացում Անկարայի դերակատարման մասին: Թուրքիայի, ինչպես նաև ցանկացած այլ երկրի ընդգրկման հարցը Լեռնային Ղարաբաղի կարգավորմանը կախված է երկրի կառուցողական ներդրումից բանակցային գործընթացում, հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան. «Ինչ վերաբերվում է Թուրքիայի միանալուն Լեռնային Ղարաբաղի կարգավորմանը, ինչպես նաև ցանկացած այլ կարգավորմանը, ցանկացած այլ բանակցային գործընթացին, խաղաղ գործընթացին` ընդհանրապես խոսքը կարող է գնալ ոչ միայն Թուրքիայի մասին, ցանկացած կառուցողական համագործակցություն կարելի է դիտարկել հենց այդպիսի տեսակետից որպես կառուցողական փոխազդեցություն: Եթե պետությունն ունի ինչ-որ դրական բան ավելացնելու, ինձ թվում է, որ այդտեղ չի կարող լինել որևէ խնդիր, սակայն կրկին ասում եմ, եթե խոսքը վերաբերվում է կառուցողական ներդրմանը»: Ինչպես երևում է, Մարիա Զախարովային արձագանքելու հարցում հայկական դիվանագիտությունն անզոր է, կամ էլ կա գիտակցում, որ Մարիա Զախարովայի դիրքորոշմանը հակառակվելը կվնասի ՀՀ ԱԳՆ-ի ղեկավարի պաշտոնավարման ճակատագրի վրա: Կարելի է միայն պատկերացնել, թե ինչ ահ ու սարսափ են կզգան ՀՀ ԱԳՆ-ի աշխատակիցները լուրից, եթե նրանց զեկուցեն, որ օրինակ` Մարիա Զախարովան է զանգահարում: Թամար Բագրատունի