Պավլիկ Մանուկյանը վերակենդանացման բաժանմունքում է.նրա կյանքին դեռ վտանգ է սպառնում

13:06 Այս պահի դրությամբ Էրեբունի բժշկական կենտրոնում ստացիոնար բուժում է ստանում 14 հիվանդ , որից  6-ը ոստիկան են, 3-ը` «Սասնա ծռեր» խմբավորման անդամներ, մնացածը` քաղաքացիներ, ասաց առողջապահության նախարարի մամուլի քարտուղար Անահիտ Հայթայանը` ներկայացնելով վիրավորների վիճակը առավոտյան ժամը 10-ի դրությամբ:Նրա խոսքով` հուլիսի 17-ին վիրավորում ստացած Գագիկ Մկրտչյանի վիճակը ծանր կայուն է, կա դրական տեղաշարժ: «Վերակենդանացման բաժանմունքի բոլոր հիվանդների մոտ կյանքի վտանգն առկա է: Հուսով ենք, եթե նոր բարդություններ չլինեն, նոր վիրահատություն չի սպասվում »,- այս մասին հայտնել է «Էրեբունի» բժշկական կենտրոնի վերականգնողական  ու թերապիայի բաժնի վարիչ Հարություն Մանգոյանը: Ըստ նրա`  «Սասնա ծռեր» խմբի անդամ   Պավլիկ Մանուկյանը առավոտյան փոքր- ինչ գիտակցության է եկել, բայց ապահովության համար միացրել են արհեստական շնչառության ապարատին։ Վնասվածքը սրունքի շրջանում է։ Հարցին, թե արդյոք թույլ են տվել, որ հարազատները տեսակցեն Պավլիկ Մանուկյանին և որդուն, Անահիտ Հայթայանը նշեց, որ թեև հարցի հասցեատերը առողջապահության նախարարությունը չէ, բոլոր դեպքերում, վերակենդանացման բաժանմունքում , ըստ կարգի,  արգելված է տեսակցել` առողջապահական խնդիրներից ելնելով: Հարցին, թե ինչ է մասնավորապես նշանակում կայուն ծանր, Անահիտ Հայթայանը նշեց, որ կայուն ծանր գնահատվում է այն դեպքում, երբ իրավիճակի վատացման շանսերը նվազում են: