Պետերբուրգում հայ երեխա է մահացել. բժիշկները հրաժարվել են ընդունել արյունահոսող կնոջը (տեսանյութ)

Պետերբուրգի Ալեքսանդրովյան հիվանդանոցում աղմկահարույց դեպք է տեղի ունեցել. արնահոսող հղի կնոջը երկար ժամանակ չեն ցանկացել ընդունել: Միջադեպի մասին հայտնի է դարձել ականատեսի շնորհիվ, որը տեղագրել է բժիշկների անտարբերությունը արնահոսող կնոջ նկատմամբ: Ինչպես հաղորդում է Life78-ը, Հայաստանի քաղաքացի 39-ամյա հղի կնոջը  հարազատները հիվանդանոց են հասցրել իրենց մեքենայով, որպեսզի ժամանակ չկորցնեն «շտապօգնության» մեքենային սպասելու վրա, սակայն հիվանդանոցում բժիշկներն անգամ ուշադրություն չեն դարձրել հղի կնոջ վրա: Ականատեսը տեսագրել է, թե ինչպես են բժիշկները անտեսում կնոջ ու նրա հարազատների օգնություն ցուցաբերելու խնդրանքներն ու աղաչանքները: Տեղի ունեցողը տեսագրող տղամարդը փորձում է ուշքի բերել բժիշկներին, հիշեցնելով, որ նրանք Հիպոկրատի երդում են տվել, ինչին ստանում է հետեւյալ պատասխանը. «Ինքդ պետք է օգնես, ոչ թե նկարես»: Հիվանդանոցի անվտանգության աշխատակիցն անգամ հարձակվում է տղամարդու վրա եւ պահանջում չնկարահանել շենքի տարածքում: Ավելի ուշ, արնահոսող հայ կնոջն, այնուամենայնիվ, օգնություն ցուցաբերում են: Կնոջը արյան փոխներարկում են անում, սակայն նա երեխային կորցնում է: ՀՀ քաղաքացի 39-ամյա Լիանա Կ.-ն հիղության 14-րդ շաբաթում էր, նա հիվանդանոց է տեղափոխվել դեկտեմբերի 31-ի գիշերը ժամը 3-ի սահմաններում: Վիրահատությունից հետո կնոջ վիճակը գնահատվել է ծանր, բայց արդեն հունվարի 3-ին նրան դուրս են գրել: Երբ տեսանյութը հայտնվել է համացանցում, որտեղ երեւում են կնոջ տանջանքները, բժիշկներն սկսել են արդարանալ, թե ով է մեղավոր ժամանակին օգնություն չցուցաբերելու համար: «Շտապօգնության» աշխատակիցները հայտարարել են, որ իրենք չպետք է օգնություն ցուցաբերեին կնոջը, քանի որ նա արդեն հիվանդանոցի տարածքում էր: Իսկ հիվանդանոցի աշխատակիցները հայտարարում են, որ անմիջապես օգնություն են ցուցաբարել հղի կնոջը: Ցանկացած դեպքում, տեսանյութի հրապարակումից հետո ՌԴ առողջապահության նախարարությունում հայտարարել են, որ տեղի ունեցածի հետ կապված ստուգումներ կիրականացնեն: NEWS.am-ի թղթակցի հետ զրույցում հիվանդանոցից հայտնեցին, որ իրենք իրավունք չունեն՝ կատարվածի վերաբերյալ տեղեկատվություն տրամադրել: «Մենք ոչ մի տեղեկատվություն չենք տրամադրում, քանի որ Լիանան եւ իր հարազատները դեմ են լուսաբանմանը: Նրանք մեզ գրավոր հայտնել են, որ հրաժարվում են մեկնաբանություններից եւ ԶԼՄ-ների հետ համագործակցելուց»,- ասացին հիվանդանոցից: news.am