Խնդրի լուծումը կարող է ունենալ 2 տարբերակ, 2 էլ իշխանության համար վատ են

«Այն, ինչ տեղի  ունենում, 90-ականների կեսից ՀՀ-ում տարվող քաղաքականության հետեւանք է, երբ կուտակվեցին սոցիալ-տնտեսական խնդիրներ, մարդիկ զրկվեցին իրենց քվեից ու լուծումը տեսան այնպես, ինչպես իշխանություն է անում՝ ուժի կիրառմամբ»,- այս մասին լրագրողների հետ հանդիպմանն ասաց քաղաքագետ, Մոդուս Վիվենդի կենտրոնի հիմնադիր նախագահ Արա Պապյանը՝ անդրադառնալով «Սասնա Ծռեր» խմբի կողմից Էրեբունու ՊՊԾ-ի գրավմանը: Լուծումը կարող է ունենալ 2 տարբերակ, երկու տարբերակն էլ իշխանության համար վատ է, վատ տարբերակն այն է, որ ինչ-ինչ պատճառներով, որը շատ քիչ հավանական եմ համարում, ապստամբները զենքը վայր դնեն և հանձնվեն իշխանության ողորմածությանը, դա չի լինի, որովհետև մենք ակնհայտորեն տեսնում ենք, որ իշխանությունը ավելի է կոշտացնում իր վերաբերմունքը, օրինակ՝ Կարո Եղնուկյանի ձերբակալությունը և 8-ից 15 տարի հոդված դնելը՝ զինված խմբին աջակցելու պատճառաբանությամբ, ակնհայտորեն ուղերձ է այդ զինված խմբին, որ Ձեզ հաստատ 15 տարուց ավելի է սպասվում, որը շատ սխալ է, տակտիկական սխալ է,ասաց նա: Բանակցությունների ընթացքում նման բան չեն անում, այլ ընդհակառակը՝ իրավիճակը պետք է մեղմվի, առավել ևս, որ ապստամբները նման հնարավորություն տվել են՝ ազատել են իրենց մոտ գտնվող բոլոր ոստիկաններին։ Ցավոք, պատասխանը չենք տեսնում։ Իշխանությունը կարող էր ազատել այն անձանց, որոնց ընդդիմությունը համարում է քաղաքական բանտարկյալներ։ Չի կարելի խոսել օրենքից, ասել՝ ուժ կիրառելը անընդունելի է, բայց միևնույն ժամանակ կիրառել ուժ։