Եթե 700 հազար մարդ դուրս եկավ փողոց, Սերժ Սարգսյանը տարբերակ չունի չհեռանալու. Ն. Փաշինյան

11:49 Երեկ անդրադառնալով իր անձի շուրջ մեղադրանքներին, ըստ որի` շարժումը ղեկավարելով զբաղված է անձնական ու կուսակցական PR-ով, Նիկոլ Փաշինյանն ասաց. «Սասնա ծռերի անդամներն իմ դեմ խոսեցին, այո, ավելին, հուլիսի 20-ին մի տղա մոտեցավ ինձ, ասաց, որ լիազորված է խմբի կողմից հայտարարություններ անել ու նշեց, որ Սասնա ծռերը դեմ են իմ գործողություններին... Հարգելիներ, գաղտնիք չկա, որ ես կուսակցության անդամ եմ ու չեմ պատրաստվում հրաժարվել իմ քաղաքական սկզբունքներից, իմ թիմից ու կենսագրությունից: Իմ կողմից սիրված Վարուժան Ավետիսյանը, որին հարգում եմ, այսօր ուղիղ եթերով ասաց, որ Նիկոլն արյան վրա իր ձեռքերն ա տաքացնում: Ուրեմն, որ ամսի 20-ին ինչ-որ մարդիկ, որ ուզում էին այստեղ արյուն լիներ, ինչի՞ համար էին ուզում, որ իրենց ձեռքերը տաքացնեի՞ն: Ես բազմաթիվ նամակներ եմ ստացել, ստորագրություններ, մարդիկ խնդրել են, որ գամ ու դերակատարում ստանձնեմ: Սերժ Սարգսյանին հեռացանելու միակ պայմանը ժողովրդի կամարտահայտությունն է ու դրա համար պետք է հարթակ ապահովենք, եւ այստեղ այլ խոսակցություններ չեն կարող լինել»,-ընդգծեց ԱԺ պատգամավորը: Նա ասաց, որ տեսնելով պրոցեսը մարում է, ինքը չէր կարող գալ այստեղ արձանագրելու համար քաղաքացիական այս պայքարի մահը: Ինքը պետք է գար այնպես, որ այս պայքարը վերածնունդ արձանագրեր, եւ երեկ դա արձանագրվեց: «Եկա համապարփակ օրակարգով, ճանապարհային քարտեզով, եւ այսօր հարց է հնչում, թե ինչի՞ է պետք ոչ բռնի այդ պայքարի կարգախոսը: Ես շատ կոնկրետ պատասխան ունեմ այդ հարցին, որովհետեւ խնդիրն այն է, որ Սերժ Սարգսյանին իշխանությունից հեռացնելու միակ ու հնարավոր պայմանը ժողովրդի կամարտահայտությունն է: Մեզ համար խնդիր է եղել այստեղ ապահովել այնպիսի պայմաններ, որ որեւէ քաղաքացի չվախենա այստեղ գալ իր կնոջ ու երեխաների հետ: Մեզ ասում են հետեւյալը՝ ասում են՝ դուք ինստիտուցիոնալ ընդդիմություն էիք ասում, ընտրություն եք ասում, բա հիմա ինչի՞ եք հրաժարվել այդ սկզբունքից: Ինստիտուցիոնալ ընդդիմության ամենակարեւոր սկզբունքը հետեւյալն է, որ ժողովրդի կամարտահայտությունը պետք է լինի հստակ ու կասկածի տեղիք չտվող»,- նշեց նա: Փաշինյանն ասաց, որ այսօրվանից իր՝ այս հարթակում գտնվելն անիմաստ է դառնում, որովհետեւ ինքը չի կարող գալ ու ասել՝ ոչինչ, թող մի 100 մարդ էլ ավել զոհվի: Վերջում նա ընդգծեց հետեւյալը. «Եթե 700 հազար մարդ դուրս եկավ փողոց, Սերժ Սարգսյանը տարբերակ չունի չհեռանալու: ՀՀ քաղաքացիներ, ես ով եմ, որ ձեր փոխարեն որոշեմ` Սերժ Սարգսյանը, մնա, թե գնա, ինչ էլ որոշեք, հարգանքով կվերաբերվեմ: Եթե ուզում եք ապրել Սաշիկ Սարգսյանի, Գագիկ Խաչատրյանի, Միհրան Պողոսյանի թալանի ու քաղաքական բեսպրեդելի պայմաններում, չեմ կարող օգնել ձեզ, իսկ եթե ազատ երկրում եք ուզում ապրել, ես ձեր ծառան եմ»: