Մանվել Բադեյան. ոչ մի երկրում իշխանությունը տեռորիստների պահանջները չի կատարում «Հրապարակ»

Մինչեւ վերջերս պատգամավոր, ներկայումս Քուվեյթում Հայաստանի դեսպան Մանվել Բադեյանն ասում է, որ ամեն ինչ պետք է անել՝ արյունահեղությունից խուսափելու համար, սակայն իշխանությունը քաղաքական որեւէ պահանջ չի կարող կատարել։ Պահանջները, ըստ Բադեյանի, աբսուրդ են ու անիրագործելի. «Օրինակ, ո՞նց ազատեն Ժիրայր Սեֆիլյանին, մարդու, որը պատրաստվում էր զինված հեղաշրջում անել»։ Բադեյանի խոսքով՝ ոչ մի երկրում իշխանությունը տեռորիստների պահանջները չի կատարում։ Միակ քայլը, ըստ Բադեյանի, որ պետք է անի «տեռորիստական» խումբը, հանձնվելն է։ «Իհարկե, իրենք դասական իմաստով տեռորիստ չեն, ջղայնացած մարդիկ են, բայց, բոլոր դեպքերում, պետք է հասկանան, որ խաղադրույքները շատ բարձր են, չի կարելի գնալ մինչեւ վերջ, պետք է խոհեմություն ցուցաբերեն։ Այս պարագայում հանրությունն ու իշխանությունը նրանց պետք է դիտարկեն ոչ որպես հանցագործ»,- ասաց Բադեյանը։ Ճշտող հարցին, թե այդ պարագայում կխուսափե՞ն պատժի կրումից, Բադեյանն ասաց, որ, իր անձնական կարծիքով, իշխանությունը քաղաքական կամք կդրսեւորի ու մեղմ կվարվի։ «Այո, կա մարդկային զոհ, եւ կան վիրավորներ, բայց այդ 25-30 տղաների մեջ բոլորը չեն, կրակոցները եղել են 1-2 հատ, մնացածին չի կարելի դիտարկել որպես հանցագործ, բայց միայն այն պարագայում, եթե ինքնակամ հանձնվեն, զինաթափվեն։ Առավել մանրամասն՝ թերթի այսօրվա համարում: