Ստեղծվում է նախադեպ նման ձևով հարցերը լուծելու համար. Ռուբեն Բաբայան

Հովհ. Թումանյանի անվան տիկնիկային թատրոնի գեղարվեստական ղեկավար Ռուբեն Բաբայանը «Տեսակետ» մամուլի ակումբում այսօր լրագրողների հետ հանդիպման ժամանակ նշեց, որ  մեղավորությունն է տեսնում նրանում, որ հասարակությունը գնալով ավելի ու ավելի ագրեսիվ է դառնում: «Մենք հաճախ պայքարում ենք հետևանքների դեմ՝ փորձելով ճնշել, վերացնել դրանք, բայց երբ պատճառները չենք վերացնում, սպառնալիքը միշտ մնում է, մանավանդ որ ագրեսիվությունը մեր հասարակության մեջ ահագնացող տեմպերով դնում է իր արմատները»,- ասաց նա: Ինչպես ասաց՝ ագրեսիվությունը ուժեղացել է անգամ կենցաղային մակարդակով, փառաբանում ենք այն ուժի գործադրումը, որը արդարացում չունի, վատ գիտենք պատմությունը. զենքը, բռնությունը ծնում են զենք և բռնություն: «Անգամ եթե այս վիճակը հանգուցալուծվի զինյալների պահանջով, արդյոք համոզվա՞ծ ենք, որ դրական արդյունք կլինի, չէ որ դա ստեղծում է նախադեպ, նման ձևով հարցերը լուծելու համար, մինչդեռ կարմիր արյան գիծը չպետք է անցնել: Ինչո՞ւ մարդու կյանքը դադարեց դառնալ գերագույն արժեք»,- ասաց Ռուբեն Բաբայանը: Ըստ նրա՝ շատ բաներ էլ հասարակությունից են կախված. «Հասարակությունը չպետք է ծափերով ողջունի այն գործելաոճը, որը հանգեցնում է մարդկային կյանքի կորստի: Անընդունելի է, որ այս պարագայում որոշ մարդիկ արդարացնում են տեղի ունեցած մարդասպանությունը»: