Հայտնաբերել են առեղծվածային Toyota Prado-ն, որով Բագրևանդ փողոցում կատարվել էր վրաերթ .ՖՈՏՈՌԵՊՈՐՏԱԺ

Հայաստանի քննչական կոմիտեի Կոտայքի մարզային քննչական վարչության Աբովյանի քննչական բաժնի քննիչ Նարեկ Մովսիսյանի որոշմամբ հարուցված քրեական գործի շրջանակում ոստիկանության Աբովյանի բաժնի, ոստիկանության Գառնիի բաժանմունքի և Աբովյանի քննչական բաժնի քննիչները, իրացնելով ստացված օպերատիվ-հետախուզական և քննչական համատեղ գործողությունները, հայտնաբերել են Toyota Prado մակնիշի այն ավտոմեքենան, որով Ջրվեժ գյուղում վրաերթ էր տեղի ունեցել, իսկ հետո վրաերթ կատարողը ծեծի է ենթարկել 21-ամյա Արտյոմ Շաբաբյանին: Ինչպես ավելի վաղ հայտնել էր ֆոտոլրագրողը, հուլիսի 17-ին արտակարգ դեպք էր տեղի ունեցել Կոտայքի մարզում: Ժամը 10:00-ի սահմաններում ոստիկանության Երևան քաղաքի վարչության օպերատիվ կառավարման կենտրոն ահազանգ էր ստացվել, որ Ջրվեժ գյուղի Բագրևանդ փողոցում՝ «եզդի Կուլիի» տան մոտ, քաղաքացուն վրաերթի են ենթարկել, իսկ հետո՝ դանակահարել: Դեպքի վայր էր մեկնել ոստիկանության Գառնիի բաժանմունքի օպերատիվ խումբը՝ բաժանմունքի պետ Համբարձումյանի գլխավորությամբ: Ժամանել էր նաև Հայաստանի քննչական կոմիտեի Կոտայքի մարզային քննչական վարչության քննիչ Մովսիսյանը: Ոստիկաններին և քննիչներին Ջրվեժ գյուղի 21-րդ փողոցի բնակիչ, 49-ամյա Խայլազ Ամարյանը հայտնել էր, որ ժամը 09:20-ի սահմաններում նշված տան մոտ գառ վաճառելու հարցի շուրջ ծագած վիճաբանության ժամանակ ամուսնու եղբայրը՝ Երևան քաղաքի Ավան 14-րդ փողոցի բնակիչ, 61-ամյա Կուլիխան Շաբաբյանը իրեն պատկանող Toyota Prado մակնիշի 38 888 համարանիշի ավտոմեքենայով (հայտնել էր նաև, որ տառերը չի հիշում), դիտավորյալ վրաերթի էր ենթարկել իր որդուն՝ նույն հասցեի բնակիչ, 21-ամյա Արտյոմ Շաբաբյանին, ով «պոլիտրավմա» ախտորոշմամբ տեղափոխվել էր «Սուրբ Գրիգոր Լուսավորիչ» բժշկական կենտրոն: Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: Լուսանկարները՝ Գագիկ Շամշյանի