Զավեն Անդրիասյանը կրկին առաջ անցավ

Շախմատի Հայաստանի տղամարդկանց առաջնությունում այսօր կայացան նախավերջին՝ 10-րդ տուրի պարտիաները: Մրցաշարի երկու առաջատարներն այս անգամ անհաջող հանդես եկան: Զավեն Անդրիասյանը սպիտակներով ոչ-ոքի խաղաց միջազգային վարպետ Մանուել Պետրոսյանի հետ: Նրան համաքայլ ընթացող Ռոբերտ Հովհաննիսյանը սեւերով պարտվեց գրոսմայստեր Սամվել Տեր-Սահակյանին: Այդպիսով, առաջնության ավարտից մեկ տուր առաջ մրցաշարային աղյուսակը 7,5 միավորով գլխավորում է Զավեն Անդրիասյանը: Նրան հաջորդող Ռոբերտ Հովհաննիսյանը ունի 7 միավոր, իսկ Արման Փաշիկյանն ու Սամվել Տեր-Սահակյանը՝ 6-ական: Վաղը նախատեսված 11-րդ տուրում Զավեն Անդրիասյանը սեւերով կհանդիպի մրցաշարի նորեկ Նորայր Թորոսյանի հետ: Չեմպիոն դառնալու համար նրան ձեռք է տալիս անգամ ոչ-ոքի արդյունքը: Ռոբերտ Հովհաննիսյանը սպիտակներով կմրցի գրոսմայստեր Հովիկ Հայրապետյանի հետ: