Փետրվարի 20-ից հետո շատ ավելի հստակ կլինի

«Դեռ մարդիկ կան, հնամյա կուսակցություններ, որոնք լուրջ դեմքով նայում են հայ ժողովրդին և հայտարարում են՝ ասելով, որ մենք ուզում ենք մտնել կոալիցիայի մեջ` հանցագործ, ահաբեկիչ, Մարդրիդյան սկզբունք ընդունող և հեղինակած, ժողովրդի տարրական արժանապատվությունը գողացած իշխանական կուսակցական խմբի հետ»,- «Նոր Հայաստան» հանրային փրկության ճակատի հանրահավաքի ժամանակ «Ժառանգություն» կուսակցության առաջնորդ Րաֆֆի Հովհաննիսյանն այսպես է մեկնաբանում ՀՅԴ-ի՝ ՀՀԿ-ի հետ կոալիցիա կազմելու մտադրությունը: Ըստ նրա՝ դեկտեմբերի 6-ը եղավ ամոթի, ինքնախարանման գագաթնակետը. «Ժողովուրդը մտածում է, որ սրա հեղինակը Սերժ Սարգսյանն ու Հովիկ Աբրահամյանն են, նաև՝ մարզպետները: Իսկ հիմա իրենք մտածում են՝ ոնց անեն ԵԽԽՎ-ում քվեարկության դրվելիք հակահայկական, հակարցախյան բանաձևերը չեզոքացնենք: Հարցազրույց եք տալիս՝ ասելով, որ եթե ժողովուրդն իշխանության գա, պատերազմ է լինելու, միայն դուք կարող եք խաղաղություն ապահովել… ինչ նե՛նգ, ինչ վախկո՛տ, ինչ հիմնազո՛ւրկ մոտեցում»,- հայտարարում է Րաֆֆի Հովհաննիսյանը: Ժիրայր Սեֆիլյանն էլ ներկայացնում է ապագայում անելիքները. «Փետրվարի 20-ին մտադիր ենք անցկացնել համաժողով՝ մի խումբ ականավոր մտավորականների հետ համագործակցությամբ, կներկայացվի մեր մշակած փաստաթուղթը, թե ինչպիսին է լինելու իշխանափոխությունից հետո իրավիճակը Հայաստանում: Փետրվարի 20-ից հետո շատ ավելի հստակ կլինի մեր ժողովրդի համար՝ երբ Նոր Հայաստանին կհաջողվի վռնդել այս ռեժիմին, մեզ ինչ Հայաստան է սպասվում»: