ԼՂ հարցով գաղտնի «թիմերը», կամ սպասված «անակնկալներ» ՌԴ-ից

  Որևէ տհաճ անակնկալ լինել չի կարող, երեկ ճեպազրույցում հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան` մեկնաբանելով հասարակության մեջ հնարավոր հուզումները, որոնք կարող են առաջանալ ղարաբաղյան խնդրի վերաբերյալ ձեռք բերված պայմանավորվածությունների հրապարակումից հետո։ Զախարովայի խոսքով, ինչպես մեկ, այնպես էլ մյուս կողմի փորձագիտական խմբերը հրաշալի տեղյակ են գործընթացից։ «Ոչ մի անակնկալ ոչ մի, ոչ էլ մյուս կողմի համար չկա և լինել չի կարող», նշել է Զախարովան։ Նրա խոսքով` մաքոքային դիվանագիտությունը, որը վարում է Ռուսաստանը, ենթադրում է հարցերի առաջադրում, պատասխանների որոնում և հավանական հանգուցալուծումներ. «Դա հսկայական գործընթաց է, որում ներգրավված են փորձագետներ ինչպես մի, այնպես էլ մյուս կողմից»։ «Վախենալ պետք է բանակցային գործընթացի խափանումից», հանգստացրել է Զախարովան` հավելելով. «Այժմ բոլոր թիմերը պետք է խաղան ընդհանուր արդյունքի հասնելու համար, քանի որ արդյունքն իսկապես պետք է ընդհանուր լինի»։ Զախարովան հավելել է, որ կարևորն ընդհանուր նպատակը` նոր զոհեր չունենալն է։ Թե ինչ նկատի ունի ՌԴ ԱԳՆ-ի ներկայացուցիչը` «բոլոր թիմեր» ասելով, այնուհետև փոքր-ինչ նշմարվում է:  Ղարաբաղյան կարգավորման գործընթացում Անկարայի դերի մասին խոսելիս Զախարովան նկատում է, որ այս կամ այն պետության ցանկացած կառուցողական դեր միայն կարելի է ողջունել. «Ցանկացած կառուցողական ազդեցություն օգուտ կտա, ցանկացած ոչ կառուցողական ազդեցություն` վնաս»։ Ինչպես հիշում ենք, ոչ վաղ անցյալում նույն Զախարովան հորդորում էր, թե ղարաբաղյան հարցում լռություն է պետք պահպանել։ Այժմ նա բավական ակտիվ է մեկնաբանություններում: Մոսկվան շաբաթվա կտրվածքով հանդես է գալիս ղարաբաղյան կարգավորման վերաբերյալ հայտարարություններով, մեկնաբանություններով... Ժողովրդական լեզվով ասած` «խեր լինի»: Մոսկվան, փաստորեն, բացահայտ ցույց է տալիս, որ իր խաղն է տանում, ունենալով` «մաքոքային դիվանագիտություն», գումարած, չի բացառում «այլ թիմերի» առկայությունը կարգավորման գործընթացում, և նրանց շահագրգռվածությունը: Խոսքն, իհարկե, Թուրքիայի ներգրավման մասին է, ինչը, փաստացի, Մոսկվան նույնիսկ հիմա, երբ դեռ լիակատար կարգավորված չեն երկու երկրների միջև հարաբերությունները` Մոսկվան չի էլ բացառում: Թամար Բագրատունի