Ռուսաստանն ուզում է, որ պատերազմում հաղթի ադրբեջանական կողմը
Ազգային ժողովի ՀՀԿ խմբակցության պատգամավոր Լեռնիկ Ալեքսանյանը լրագրողների հետ հանդիպմանը հայտարարեց,որ Ղարաբաղյան հարցը շատ շուտ չի լուծվելու, քանի որ Ադրբեջանն ու Հայաստանն ունեն հակադիր կարծիքներ.«Ոչ մի գերտերություն չի կարող արցախցուն պարտադրել ապրել Ադրբեջանի կազմում: Այդ մասին նաեւ նախագահն է շատ հստակ հայտարարել:Ռուսաստանն ուզում է իր ազդեցությունը մեծացնել տարածաշրջանում. ոչ հայամետ է, ոչ ադրբեջանամետ:Մեզ դուր չի գալիս Ռուսաստանի մեղմ քաղաքականությունը, նույն Ուկրաինային, Վրաստանին էլ դուր չի գալիս ՆԱՏՕ-ի վարած քաղաքականությունը: Այստեղ մենք մեր շահը պետք է տեսնենք եւ ի ուրախություն մեզ, մեր արտաքին քաղաքականությունը միայն պրոռուսական չէ եւ զարգացնում ենք մեր հարաբերությունները բոլոր այն կազմակերպությունների հետ, որոնց հետ հնարավոր են»: Ինչ վերաբերում է Ռուսաստանի հայտարարությանը, թե իրենք շարունակելու են զենք վաճառել Ադրբեջանին, Լեռնիկ Ալեքսանյանը հորդորեց չմոռանալ, որ Հայաստանը Ռուսաստանի համար ռազմավարական դաշնակից է, որը չենք կարող ասել Ադրբեջանի դեպքում: «Այս հայտարարությամբ Ադրբեջանն ու Ռուսաստանը կողմնակից են Ղարաբաղյան հարցի ռազմական լուծմանը: Երբ ՆԱՏՕ-ն գնում էր միջազգային կայունության, Ռուսաստանը գնաց Ադրբեջան եւ հայտարարեց, որ իրենք խնդրի լուծում են տեսնում եւ շարունակելու են զենք վաճառել Ադրբեջանին: Թե ինչպես են տեսնում Ղարաբաղյան հարցի լուծումը, մեզ համար դեռ անհասկանալի է, բայց թերեւս դա ռազմական ճանապարհն է»,-հայտարարեց քաղաքագետ Աղասի Ենոքյանը: Լեռնիկ Ալեքսանյանը հակադարձեց, թե զենք վաճառվում է տարածաշրջանում հավասարակշռությունն ապահովելու համար: «Բալանսը խախտված է հօգուտ Ադրբեջանի: Ռուսաստանն ուզում է, որ պատերազմ լինի, որ հաղթի ադրբեջանական կողմը, իսկ մենք խնդրենք, որ ռուսական զորքը մտնի Հայաստան: 25 տարի Ադրբեջանը զինվել է մինչեւ ատամները, Հայաստանն այս ընթացքում հասցրել է ստեղծել կոռումպացված պետություն, խորացրել ենք մեր հարաբերությունները միայն Ռուսաստանի հետ»,- արձագանքեց Աղասի Ենոքյանը:
Հետևեք մեզ Viber-ում
