Օմար Չեչենը զոհվել է

«Իսլամական պետություն» ահաբեկչական խմբավորումը հաստատել է, որ Օմար Չեչեն կեղծանունով հայտնի բարձրաստիճան առաջնորդը զոհվել է: Սիրիայում նրա զոհվելու մասին ամիսներ առաջ հաղորդել էր Պենտագոնը և Բրիտանիայում գտնվող մարդու իրավունքների մոնիթորինգի սիրիական խումբը, տեղեկացնում է The Guardian-ը: Տեղեկությունների համաձայն՝ Պենտագոնի կողմից ԻՊ-ի «պատերազմի հարցերով նախարար» համարվող Աբու Օմար ալ-Շիշանին զոհվել էր Սիրիայում ԱՄՆ-ի իրականացրած օդային հարվածների ժամանակ: Չորեքշաբթի օրն ԻՊ-ի քարոզչության հարցերով «Ամաք» գործակալությունը հայտարարել է, որ Շիշանին սպանվել է Իրաքում՝ Մոսուլից հարավ գտնվող Շիրքաթ քաղաքում կռվի ժամանակ: Պենտագոնի պաշտոնյաները հայտնել են, որ իրենք տեղյակ են այդ հաղորդագրությունների մասին, բայց չեն կարող դրանք հաստատել կամ հերքել: Շիշանին, ով համարվում էր ԻՊ-ի առաջնորդ Աբու Բաքր ալ-Բաղդադիի ռազմական խորհրդականը, ծնվել է 1986 թվականին Վրաստանում: ԱՄՆ պաշտոնյաների համաձայն՝ նա կռվել է որպես ապստամբ Չեչնիայում ռազմական գործողությունների ժամանակ, իսկ 2006 թվականին միացել է Վրաստանի զինված ուժերին և կռվել ռուսական զորքերի դեմ, իսկ երկու տարի անց առողջական պատճառներով դուրս է գրվել: Նա ձերբակալվել է 2010 թվականին՝ զենք պահելու պատճառով, և մեկ տարի անցկացրել է բանտում, իսկ այնուհետև 2012 թվականին Վրաստանից մեկնել է Ստամբուլ, ապա՝ Սիրիա: