Երրորդմասցի Լյովիկի և նրա ընկերների սպանության գործով վկան ամուսնացել էր ու 3 օր տանը չի եղել

Երրորդմասցի Լյովիկի ու նրա ընկերների սպանության գործով այսօրվա դատական նիստը սկսվեց և հետաձգվեց: Այսօր ևս նախատեսվում էր շարունակել վկաների հարցաքննությունը, սակայն բերման ենթարկված վկաները չէին ներկայացվել, իսկ ծանուցված վկաներից որևէ մեկը չէր ներկայացել: Երևանի Էրեբունի և Նուբարաշեն վարչական շրջանների ընդհանուր իրավասության դատարանը՝ նախագահությամբ Արտուշ Գաբրիելյանի, կողմերին տեղեկացրեց, որ բերման ենթարկված 11 վկաներից մի քանիսն արտերկրում են, մի քանիսը ծանուցված բնակության վայրում չեն բնակվում, իսկ նրանցից մեկն էլ, պարզվեց, ամուսնացել է ու արդեն 3 օր է տանը չի: Ինչ վերաբերում է ծանուցված 5 վկաներին, ովքեր ևս չէին ներկայացել, այդ թվում նաև՝ ամբաստանյալ Սարգիս Հախանումյանի եղբայրը, դատարանը նրանց նկատմամբ բերման ենթարկելու որոշում կայացրեց: Հաջորդ դատական նիստը տեղի կունենա հուլիսի 19-ին: Ըստ մեղադրանքի՝ 2015թ. մարտի 4-ին՝ ժամը 13:50-ի սահմաններում, Վահան Հակոբյանը, Սարգիս Հախանումյանը և Սարգիս Գրիգորյանը նախնական համաձայնությամբ, շատերի կյանքի համար վտանգավոր եղանակով, երկու և ավելի անձանց ապօրինաբար կյանքից զրկելու դիտավորությամբ, իրենց մոտ ապօրինի պահվող մարտական ակոսափող հրազեն հանդիսացող թվով 3 ինքնաձիգներից կրակահերթ են արձակել (առնվազն 82 փամփուշտ) Լևոն Ղազարյանի, Դրաստամատ Թադևոսյանի և Մեսրոպ Նազարյանցի ուղղությամբ, որի հետևանքով ստացված հրազենային վնասվածքներից Մ.Նազարյանցը տեղում, իսկ Լ.Ղազարյանն ու Դ.Թադևոսյանը «Էրեբունի» բժշկական կենտրոն տեղափոխվելու ճանապարհին մահացել են: Նշենք նաև, որ բոլոր երեք ամբաստանյալները «Գաստիկ»-ը՝ Վահան Հակոբյանը, «Տլե»-ն՝ Սարգիս Հախանումյանը, ու «Ծգլ»-ը՝ Սարգիս Գրիգորյանը, առաջադրված մեղադրանքում իրենց մեղավոր չեն ճանաչում:  

Փաստինֆո