Լավրովն ո՞ւմ համար է «չարչարվում»

Օրեր առաջ, երբ Ռուսաստանի արտգործնախարար Սերգեյ Լավրովը Երևանում էր, ադրբեջանական գործակալությունները հայտնեցին, թե Երևանում հանդիպումներից հետո Լավրովն անմիջապես կմեկնի Բաքու: Անգամ, տեղեկություններ կային, թե երևանյան բանակցություններից է կախված լինելու հարցը` թե Լավրովը կմեկնի՞ Բաքու և կկայանա՞ առաջիկայում արդյոք Սարգսյան-Ալիև հաջորդ հանդիպումը: Երեկ ահա, հայտնի դարձավ, որ հուլիսի 11-12-ին Ռուսաստանի արտգործնախարար Սերգեյ Լավրովն աշխատանքային այցով կգտնվի Բաքվում: Ըստ ՌԴ ԱԳՆ մամլո խոսնակ Մարիա Զախարովայի` Լավրովի այցի օրակարգում «երկկողմ համագործակցությանը և ղարաբաղյան կարգավորմանն առնչվող հարցերն են»: Այնուհետև, Մարիա Զախարովան անդրադարձել է Լեռնային Ղարաբաղի հակամարտության կարգավորմանը` նշելով, որ ողջունվում է ցանկացած երկրի կառուցողական դերը Արցախի հակամարտության կարգավորման գործում: Նա նկատել է, թե ԼՂ հակամարտության կարգավորման գործում կան տարբեր ձևաչափեր. «Դա ԵԱՀԿ Մինսկի խումբն է, դա Հայաստանի և Ադրբեջանի միջև ուղիղ երկխոսությունն է և Հայաստանի, Ադրբեջանի և Ռուսաստանի նախագահների միջև բարձր մակարդակի հանդիպումներն են։ Դրանք բոլորը գործող մեխանիզմներ են»։ Մի առիթով, ամիսներ առաջ նաև Ռուսաստանի նախագահի մամլո խոսնակ Դմիտրի Պեսկովն էր խոսել ԼՂ կարգավորմամբ զբաղվող «տարբեր ձևաչափերի» մասին: Իհարկե, բոլորին է հայտնի, որ ղարաբաղյան կարգավորմամբ զբաղվում է միայն ԵԱՀԿ Մինսկի խումբը, ու այլ «ձևաչափեր» գոյություն չունեն: Բայց, բոլորովին էլ զարմանալի չէ, որ Ռուսաստանը խոսում է «տարբեր ձևաչափերի» գոյության մասին, որովհետև ասելով` «տարբեր ձևաչափեր» ռուս պաշտոնյաները նկատի ունեն հենց Մոսկվային, պարզապես նրանք փոքր-ինչ համեստություն են ցուցաբերում: Բայց այս ամենում հետաքրքրական է պաշտոնական Երևանի պահվածքը: Երեկ փոխարտգործնախարար Շավարշ Քոչարյանը հերքել է տեղեկություններն այն մասին, թե Ռուսաստանի արտգործնախարարը Երևան էր բերել ղարաբաղյան հիմնախնդրի կարգավորման տարբերակ, որը նախատեսում է հայ-ադրբեջանական ու հայ-թուրքական սահմանների ապաշրջափակում: «Լավրովը տենց բաներ չի բերել», - հավաստիացրել է Շ. Քոչարյանը՝ հավելելով, որ Ռուսաստանի արտաքին գերատեսչության նախագահը Հայաստանում քննարկել է ՀԱՊԿ-ի հարցերը: Մինչդեռ երեկ ՀՀԿ գործադիր մարմնի նիստից հետո ՀՀԿ խոսնակ Էդուարդ Շարմազանովը լրագրողներին հայտնել է, որ նախագահ Սերժ Սարգսյանը կուսակիցներին է ներկայացրել ՌԴ ԱԳ նախարար Լավրովի հետ հանդիպման արդյունքները: Հետաքրքրական իրավիճակ է փաստորեն. Բաքուն դարձյալ չի թաքցնում, որ Ռուսաստանից ակնկալիքներ ունի, մինչդեռ պաշտոնական Երևանը դեռ ապրիլյան քառօրյա պատերազմից օրեր անց, երբ Երևան ժամանեց Լավրովը, այդ օրվանից սկսած հերքում է, որ «Լավրովի պլանի» գոյությունը: Սպասենք Բաքվում Լավրովի բանակցությունների ավարտին և դրան հետևող տեղեկատվական հոսքին: Թամար Բագրատունի