Վրաստանը կշարունակի մասնակցել ՆԱՏՕ-ի առաքելությանը

News Georgia լրատվական գործակալության փոխանցմամբ` Վրաստանը պատրաստ է շարունակել իր մասնակցությունը Աֆղանստանում ՆԱՏՕ-ի «Վճռական աջակցություն» (Resolute Support) խաղաղապահ առաքելությանը: Այդ մասին հայտարարել է Վրաստանի նախագահ Գեորգի Մարգվելաշվիլին, որի խոսքերը փոխանցել է ԱԱԽ քարտուղար Իրինա Իմերլիշվիլին: Վերջինս ընդգծել է, որ դաշինքի անդամ բոլոր երկրներն էլ հայտարարում են ահաբեկչության դեմ համատեղ ջանքերի մասին: «ՆԱՏՕ-ն որոշել է երկարաձգել Աֆղանստանում առաքելությունը: Այսինքն՝ Աֆղանստանում շարունակվելու է Resolute Support առաքելությունը, և Վրաստանի նախագահը համապատասխանաբար հայտարարել է, որ ներքին ընթացակարգերի ավարտից հետո Վրաստանը պատրաստ կլինի շարունակել առաքելությունը զինծառայողների այն քանակությամբ, որոնք մենք այսօր ունենք Աֆղանստանում»,- ասել է ԱԱԽ քարտուղարը: Վրաստանի արտգործնախարար Միխայիլ Ջանելիձեն իր հերթին հայտարարել է, որ Աֆղանստանն ունի ՆԱՏՕ-ի անդամ ու գործընկեր երկրների օգնության կարիքը, և որ Վրաստանը շարունակելու է մասնակցել այդ երկրում ՆԱՏՕ-ի առաքելությանը: Resolute Support առաքելությանը մասնակցում է 870 վրացի զինծառայող, որոնցից 13-ը կանայք են: