Կարծես երիտասարդ սիրահարներ լինեն

Der Spiegel պարբերականի փոխանցմամբ՝ Մոսկվայի ու Անկարայի հաշտեցումը տեղի է ունենում շշմեցնող տեմպերով, իսկ Կրեմլում արդեն երազում են ՆԱՏՕ-ից Թուրքիային հեռացնելու մասին: Գերմանական պարբերականը հիշեցնում է Ռուսաստանի Լիբերալ-դեմոկրատական կուսակցության առաջնորդ Վլադիմիր Ժիրինովսկու խոսքերը, ով մյուսներից ավելի լավ է կարողանում պաշտպանել Կրեմլի արտաքի քաղաքական կուրսի հանկարծակի փոփոխությունները: Ժիրինովսկին 2015 թվականի նոյեմբերին «Սու-24»-ի միջադեպից հետո Թուրքիայի նախագահ Ռեջեփ Էրդողանին անվանել էր «թուրքական Հիտլեր» և իր կողմնակիցներին հավաքել էր Մոսկվայում Թուրքիայի դեսպանատան առջև, որոնք սկսել էին լոլիկներ նետել: Սակայն այդ ամենն արդեն անցյալում է, Էրդողանն արդեն նամակ է գրել Ռուսաստանի նախագահ Վլադիմիր Պուտինին, որում առկա է «ներողություն» բառը, երկու երկրները սկսել են մերձենալ արագացված տեմպերով: Պուտինը մի քանի օրում չեղյալ է հայտարարել թուրքական ապրանքների ներկրման արգելքը, իսկ տուրօպերատորները սկսել են պատրաստվել ռուսաստանցիների համար Թուրքիայում հանգիստ կազմակերպելուն՝ չնայած ահաբեկչությունների սպառնալիքին: Ժիրինովսկին հայտարարել է, որ Թուրքիան շուտով դուրս կգա ՆԱՏՕ-ից և կմտնի Մաքսային միության մեջ, կդառնա ավելի մոտ, քան եղբայրական Բելառուսն է: Պարբերականը հիշեցնում է, որ Ռուսաստանն ու Թուրքիան նախկինում 12 անգամ պատերազմել են միմյանց դեմ, և որ նրանք տարածաշրջանային մրցակիցներ են Սև ծովում, Կովկասում ու Մերձավոր Արևելքում: Եվ, այնուամենայնիվ, երկու կողմն էլ ներկայումս իրենց պահում են ինչպես երիտասարդ սիրահարներ: