ՌԴ գործողությունները Վրաստանի նկատմամբ օկուպացիա է. Քերի
ԱՄՆ պետքարտուղար Ջոն Քերին, ով հուլիսի 6-ին այցելել է Թբիլիսի, Մոսկվային կոչ է արել պահպանել Վրաստանի հետ 2012 թվականին կրակի դադարեցման վերաբերյալ ստորագրված համաձայնագիրը եւ օկուպացիա է անվանել Վրաստանի նկատմամբ Ռուսաստանի գործողությունները: «Միացյալ Նահանգները հաստատակամորեն աջակցում են Վրաստանի տարածքային ամբողջականությանն ու ինքնիշխանությանը»,- մասնավորապես՝ ասել է Քերին՝ նշելով, որ Ռուսաստանի կողմից վրացական տարածքների բռնազավթումն անընդունելի է: 2008 թվականի օգոստոսին ռուս-վրացական պատերազմից հետո կողմերի միջեւ ստորագրված համաձայնագրով՝ զինված ուժերը պետք է վերադարձվեին մինչեւ ռազմական գործողությունները սկսվելու դիրքերը, իսկ կրակը պետք է դադարեցվեր: Վրացական կողմը, սակայն, Հարավային Օսիայում տեղակայված ռուս սահմանապահներին պարբերաբար մեղադրում է հրադադարի ռեժիմը խախտելու եւ սահմանային գիծը դեպի Վրաստանի տարածքներ բերելու մեջ: Դառնալով Քերիի թբիլիսյան այցին՝ նշենք, որ հուլիսի 6-ին ԱՄՆ պետքարտուղարը հանդիպել է վրաց վարչապետ Գեորգի Կվիրկաշվիլիի հետ, իսկ հուլիսի 7-ին հանդիպելու է Վրաստանի ընդդիմադիր «Միացյալ ազգային շարժում» եւ «Ազատ դեմոկրատներ» կուսակցությունների ներկայացուցիչների հետ, այնուհետեւ մեկնելու է Կիեւ:
Հետևեք մեզ Viber-ում
