Վիեննայի պայմանավորվածությունները պետք է իրականացվեն. Սվիտալսկի

Եվրամիության պատվիրակության ղեկավար, դեսպան Պյոտր Սվիտալսկին՝ խոսելով Եվրամիության՝ ԼՂՀ կարգավորման գործընթացում մասնակցության մասին հայտարարեց.«Բոլորիս համար պարզ է, որ վերջին ամիսներին նոր շարժ է նկատվում ԼՂՀ կարգավորման գործընթացում:  Վիեննայի գագաթաժողովը նոր գլուխ բացեց ԼՂՀ խաղաղ կարգավորմանն ուղղված ջանքերում, փորձ արվեց գտնել ազնիվ և բազմակողմանի լուծում այս խնդրում: Այս գործընթացը շարունակվում է: Եվրամիությունն ամբողջովին աջակցում է հիմնախնդրի կարգավորման այս ձևաչափին.  գլխավոր դերը Մինսկի խմբի համանախագահներինն է: Եվրամիությունն այս գործընթացում աջակցում է»; Նա նշեց, որ շուտով՝ հենց վաղը, Հարավային Կովկասում Եվրամիության հատուկ ներկայացուցիչը գալու է Հայաստան՝ հանդիպելու Հայաստանի  Հանրապետության Նախագահի,  Արտաքին գործերի նախարարի և այլ բարձրաստիճան պաշտոնյաների հետ: Ըստ ԵՄ դեսպանի՝ նա այցով նպատակ ունի հանդես գալ՝ որպես ԼՂՀ կարգավորման գործընթացի աջակից: Սվիտալսկին առաջարկեց շատ չխոսել, թե ինչ է արվում այս հիմնախնդրի կարգավորման գործընթացում. «Ես կարող եմ ասել, որ հիմա շատ հանրային դիվանագիտության ժամանակ չէ: Մենք փորձում ենք խաղաղ կարգավորմանը տանող գործընթացին աջակցել:Կարծում եմ, որ Վիեննայում ձեռք բերված պայմանավորվածությունները պետք է իրականացվեն, որովհետև դրանք կառուցում են այս գործընթացում փոփոխության ճանապարհը, լավ, դրական փոփոխության»: