ՀԳՄ են անդամագրվում, որ գնան Ծաղկաձոր հանգստանալու

«Հրապարակ» օրաթերթը գրում է. «Մենք գրել էինք, որ Հայաստանի գրողների միությունը վերջերս շուրջ 120 դիմում է ստացել՝ ՀԳՄ-ին անդամագրվելու, որից 47-ը բավարարվել է։ ՀԳՄ հանձնաժողովը, ծանոթանալով դիմումատուների տպագրված գրքերին, դրական կարծիք է հայտնել եւ երաշխավորել նրանց անդամագրումը։ Սակայն երեկ տեղեկացանք, որ 47 նորագիրները նույն իրավունքները չեն ունենալու, ինչ հնաբնակները՝ նրանք 3 տարի չեն կարողանալու օգտվել Ծաղկաձորի Գրողների միության հանգստյան տան ծառայություններից։ Հիշեցնենք, որ գրողները 12-18 օր անվճար «ստեղծագործական հանգստի» իրավունք ունեն Ծաղկաձորում, եւ հենց դա է ՀԳՄ անդամ դառնալու գլխավոր պատճառը։ ՀԳՄ նորագիրներից մեկն անգամ ասաց, որ 3 տարվա արգելքը կարող է ՀԳՄ նոր անդամների «մաղվելու» պատճառ դառնալ. «Ի՞նչ իմաստ ունի մնալ միությունում, եթե հանգստյան տուն չենք կարողանալու գնալ»»։