Ինձ չեն ազատել աշխատանքից, կրճատել են հաստիքը... դեռ առիթ կունենաք խոսելու. Նարեկ Մալյան

ՀՀ ոստիկանությունում կրճատվել են մի քանի հաստիքներ, այդ թվում նաև՝ ՀՀ ոստիկանապետ Վլադիմիր Գասպարյանի խորհրդական Նարեկ Մալյանի հաստիքը: Այս մասին հայտնել են ոստիկանությունից, թեեւ լուրեր են շրջանառվում, որ Մալյանը ոչ թե ազատվել է ոստիկանության համակարգից, այլ հեռացվել է ՀՀ ոստիկանապետ Վլադիմիր Գասպարյանի անմիջական հրամանով: Hraparak.am-ը զրուցել է Նարեկ Մալյանի հետ, թե ինչո՞ւ են նրան ազատել աշխատանքից, ոստիկանապետի նախկին խորհրդականը պատասխանեց. «Ինձ չեն ազատել աշխատանքից, կրճատել են այն հաստիքը, որտեղ ես աշխատում եմ և ոչ միայն իմ, այլ ևս 7 հոգու, օգնականների և խորհրդականների օպտիմալացման շրջանակներում կրճատվել է: Ես հասկանում եմ, որ կան ինչ-որ մարդիկ, ովքեր շահագրգռված են, որ ինձ հեռացնեն, ինչ-որ ինտրիգներ փնտրեն, բայց նման բան չկա, հաստիքն է կրճատվել և ոչ միայն իմ»: Պարոն Մալյան հնարավո՞ր է այդ հաստիքը կրճատված լինի Մհեր Ենոքյանի հետ կապված վերջին դեպքերի հետ. «Դուք կարծում եք, որ 7 հոգու հանել են Մհեր Ենոքյանի հետ կապվա՞ծ, եթե 7 հոգու հաստիք կրճատել է ոստիկանապետը Մհեր Ենոքյկանի հետ կապված… ինչ-որ մարդիկ եթե այդպես են մտածում, այդ միտքն իրենց տաքացնում է, թող այդպես մտածեն, ես խնդիր չեմ տեսնում»: Ինչո՞վ եք այժմ զբաղվելու, տեղյա՞կ էիք, որ հաստիքը կրճատվելու է. «Իհարկե տեղյակ էի, կարծում եմ 2-3 օր առաջվա տեղի ունեցած իրողություն է, որևիցե բան չի փոխվում իմ կյանքում, որևիցե սկզբունք չի փոխվում: Ես կարծում եմ` շատ շուտով իմ նոր զբաղմունքի մասին առիթ կունենանք խոսալու»: Հիշեցնենք, որ վերջերս Նարեկ Մալյանին դատի էր տվել ցմահ դատապարտյալ Մհեր Ենոքյանը, Նարեկ Մալյանն իր ՖԲ էջում գրառում էր թողել՝ Մհեր Ենոքյանին դասելով Վալերի Պերմայկովի, Բրեյվիկի շարքին. «Այսօր ավելի հուզիչ է ոճրագործի բանաստեղծությունները, քան 17 տարեկան կտրտված զոհի դիակը: Այս գրառման տակ էլ մեկնաբանություն էր թողել Իզաբելլա Աբգարյանը. «Թող մասնատված ու սպորտային պայուսակի մեջ լցված տղայի մոր գիրն էլ կարդան...»: Դատարանն վերջերս մերժել էր Ենոքյանի հայցը, որից հետո ի պաշտպանություն Մհեր Ենոքյանի` թվով 24 մտավորականներ բաց նամակ էին հղել ոստիկանապետ Վլադիմիր Գասպարյանի՝ ուշադրություն հրավիրելով Նարեկ Մալյանի պահվածքի վրա: