«сарай-ի համար աղմուկ չեն հանում». Լևոն Իգիթյան

«Եթե մարդիկ ունեն հուշեր այդ շենքի հետ կապված, ուրեմն դա հուշարձան է»,-այսօր՝ հունվարի 21-ին հրավիրված քննարկման ժամանակ հայտարարեց ճարտարապետ Արսեն Կարապետյանը: «Մեր այսօրվա քաղաքաշինությունը չի համապատասխանում արդի հասարակության, արդի պետության պահանջներին, և բնորոշ է ավելի շատ միապետական համակարգին»,- պարզաբանեց ճարտարապետը: Նրա խոսքերով՝ ժամանակակից երկրներում պահպանել-չպահպանել բանավեճը վաղուց վերջացել է: Նա համարում է, որ քաղաքաշինությունը պետք է միջավայրային լինի. «Ես ուզում եմ ինչ-որ մեկը օբյեկտիվ չափորոշիչներ հնչեցնի՝ որն է այդ չափորոշիչը, ինչը կարող ենք համարել պատմական հուշարձան, ինչը չենք կարող: Եթե մարդիկ համարում են, որ այդ փոքր կառույցի հետ կան հուշեր, դա արդյոք չի նշանակո՞ւմ, որ այն արդեն հուշարձան է, ի՞նչ բան է պատմական հուշարձան: Եվ այդ մոտեցումը, որ ունենք ինչ-որ գլխավոր բաներ, դա եւս շատ հնացած է: Գլխավոր հրապարակ, գլխավոր շենք, նման բան չկա, ամեն ինչն էլ գլխավոր է, եւ շատ կարեւոր: Օրինակ՝ ինչո՞վ է Օպերան ավելի կարեւոր, քան Փակ շուկան, եթե ինչ-որ մեկը օբյեկտիվ, գիտական մակարդակով բացատրի, ես շնորհակալ կլինեմ, բայց մինչեւ օրս նման բան երբեւիցե չի հնչել»,-ընդգծեց ճարտարապետը: Երեւանի ավագանու անդամ, ճարտարապետ  Լեւոն Իգիթյանն իր խոսքում դիտողություն արեց նախորդ բանախոսին  նշելով, որ բոլորին հայտնի է Փակ Շուկայի եւ Օպերայի տարբերությունը: Դա այն է, որ  առաջինում առեւտուր են անում, երկրորդում՝ երգում են: «Եթե մի ժողովուրդ նման շինությունը համարում է արժեք, ես ցավում եմ մեր ժողովրդի համար: Մենք այդքան հոգեպես եւ հոգեւոր տեսակետից աղքատ չենք, сарай-ի համար աղմուկ չեն հանում»,- ընդգծեց Իգիթյանը: Աստղիկ Ավագյան