«Թորգոմյան են կոչվում տառերը, որոնցով մենք այսօր գրում ենք».բացահայտո՞ւմ

«Կենաց լույս և սատանական փորձություն» գրքի հեղինակ Լևոն Պողոսյանն իր աշխատությունում առաջ է քաշում մի տեսություն, որը դեռ տարածված չէ գիտական աշխարհում. «Որպեսզի ամեն մի նորույթ արձանագրվի գիտական աշխարհում, այն նախ տվյալ պետության ակադեմիան պետք է արձանագրի: Առայժմ մեր ակադեմիան նման ցանկություն չունի»,- երեկ լրագրողների հետ հանդիպմանը հայտարարեց գիտական աշխատությունների հեղինակ  Լևոն Պողոսյանը հավելելով, որ իր աշխատությունն արդեն մի քանի տարի է` կա ինտերնետային տարածքում, ինչպես նաև ուղարկված է աշխարհի տարբեր երկրների ակադեմիաներ, բայց արձագանք չկա: Աշխատությունն արձագանք չի գտնում, քանի որ դրանում խոսվում է աշխարհի շատ ու շատ երկրների, նաև հայերիս մեծամասնության համար ոչ ընդունելի տեսությունների մասին: Լևոն Պողոսյանը, մեկնաբանելով իր աշխատության վերնագիրը, նշեց, որ կենաց լույսն այն բնական լույսն է, որի ներքո բոլորս գործում և ապրում ենք, իսկ 12 կենդանակերպերից ամենավերջինը` ձուկը, մարդկության փորձության կենդանակերպն է` սատանական փորձությունը: Ամեն մի կենդանակերպում արեգնակային համակարգը տևում է 2128 տարի, իսկ բոլոր 12 կենդանակերպերի մեկ պտույտը Ծիր կաթինով` 25 հազար տարի: «Ձուկը մարդկության փորձության համար է նախատեսված` ինչքանով է մարդը հասցնում 23 հազար տարվա ընթացքում կեղտոտվել, որպեսզի հետո մաքրվի: Իսկ ինքնամաքրազտման հատկություն ունի միայն ու միայն առաջին արարված մարդու` հայի գենը, որը կոչվում է արմենոիդ: Քանի որ մարդկության քանակն այնքան էր մեծացել, որ այլ կերպ հնարավոր չէր արարչական օրենքներով ապրել և ղեկավարվել, մարդկանց մաքրազատել էր պետք, այդ իսկ պատճառով քաղաքակրթությունը, որին արարիչ ենք համարում, նախատեսել է այս վերջին փուլը` փորձությունը»,- նշեց   Պողոսյանը : Ըստ Լևոն Պողոսյանի՝ այսօրվա մեր տառերը թորգոմյան են, որոնց հետ Մեսրոպ Մաշտոցը կապ չունի, իսկ դրանից առաջ եղել է Արամյան այբուբենը. «Բոլոր 10 ազգերն ի սկզբանե ապրել են Արարատի վրա, բայց շատանալով սկսել են կռվել իրար հետ: Եվ Արամը, ինչպես Քեյսին է ներկայացնում, կառուցել է առաջին պետությունը, իսկ մնացած 9 ազգերին ասվել է, որ այդպես պետք է կառուցվի պետությունը: Այդ ազգերն իջել են Արարատից, իսկ Արամը դարձել է առաջին պետության արքան, և այդ պետությունը Հայոց պետությունն է: Հետագայում ծնվեց այն գաղափարը, որ հայը պետք է ստրկացում ապրի, քանի որ առաջին արարված մարդն է: Բիբլիայում գրված է, որ Եհովան ասաց՝ Ամալեկի (հայի) հիշատակը երկնքի տակից պետք է ջնջեմ, իսկ հիշատակը ջնջելու համար նախ պետք էր պատմությունը, գիրն ու գրականությունը ջնջել: 301թվականին արգելվեցին հայկական դպրոցները, որովհետև դրանք մեհյաններում էին: Մինչև 405 թվականը մենք դպրոց չենք ունեցել: Հետո Մեսրոպ Մաշտոցը, որը վարդապետ էր և եկեղեցում ասորերենից ու հունարենից թարգմանություններ էր անում, բողոքեց, որ հայը քրիստոնյա չի դառնում, որովհետև շատ հպարտ է ու չի ուզում Բիբլիան այլ լեզուներով կարդալ: Եվ հարյուր տարի հետո հայոց տառերը վերադարձվեցին, դպրոցներ բացվեցին եկեղեցիներում: Գրերը Մաշտոցը չստեղծեց: Ինչպես Կորյունն է վկայում, երկաթագրերը բերեցին արքունիք և շարեցին արքայի, Մաշտոցի և Սահակ Պարթևի դիմաց: Թորգոմյան (Թորգոմը Հայկի հայրն էր) են կոչվում տառերը, որոնցով մենք այսօր գրում ենք: Դրանք 8512 տարի առաջ են ստեղծվել»,- վերլուծում է  Պողոսյանը: Ըստ տեսաբանի, եթե առաջին քաղաքակրթության սկիզբը հայն է, բնականաբար նա բացի խոսակցական լեզվից նաև գրառման միջոց է ունեցել, և Տիրը եղել է գրի և գրականության դիցը: Լևոն Պողոսյանի հայտարարությունը խառնաշփոթ առաջացրեց նաև լրագրողների մեջ: Հասկանալի չէ, թե ինչ նպատակով է արվում այս հայտարարությունները, բայց տեսաբաը փորձում է փաստել իր ուսումնասիրությունները: Աստղիկ Ավագյան