Պարոն Ալիևը չէ Լեռնային Ղարաբաղի ժողովրդին անկախություն տվողը.Շարմազանով
Լեռնային Ղարաբաղի հակամարտության կարգավորման վերաբերյալ Ադրբեջանի նախագահ Իլհամ Ալիևի վերջին հայտարարությունը լի է պատմական անճշտություններով և սուտ տեղեկություններով, լրագրողների հետ զրույցում այս մասին ասաց ՀՀ Ազգային ժողովի փոխնախագահ Էդուարդ Շարմազանովը: «Նա խոսում է Ադրբեջանի պատմական հողերի մասին, բայց ո՞րն է Ադրբեջանի պատմությունը: Ադրբեջանն ընդամենը 98 տարվա պատմություն ունի: Հինգ անգամ նույն անհեթեթությունը կրկնելուց ասածներիդ արժեքը չի փոխվում: Դրանով դու ավելի անհեթեթ ես դառնում մարդկանց աչքերում: Ինչ վերաբերում է հակամարտության կարգավորման փուլային տարբերակին, ինչի մասին խոսում են Ալիևը և նրա աշխատակազմը, մեր դիրքորոշումը հետևյալն է՝ Լեռնային Ղարաբաղը ոչ մի կարգավիճակով չի կարող ընդգրկվել Ադրբեջանի կազմում: Լեռնային Ղարաբաղի Ինքնավար Մարզը երբեք չի եղել անկախ Ադրբեջանի կազմում: Դա բլեֆ է, որն Ալիևը անում է: Լեռնային Ղարաբաղի Ինքնավար Մարզի ժողովուրդը 1988թ. սկսել է իր ինքնորոշման պայքարը, և մենք ամեն ինչ անելու ենք, որպեսզի այդ պայքարն ավարտվի հաղթանակով: Իսկ հաղթանակը Լեռնային Ղարաբաղի ժողովրդի կամարտահայտության պարտադիր իրացումն է և արդյունքում Ղարաբաղի ժողովուրդն ինքը կորոշի իր ճակատագիրը, որը, բնականաբար, չի լինի Ադրբեջանի կազմում: Պարոն Ալիևը չէ Լեռնային Ղարաբաղի ժողովրդին անկախություն տվողը, Աստված է ժողովուրդներին տալիս ազատության և անկախության ձգտումը, իսկ ինքնորոշվելու միջազգային իրավունքը ընձեռվում է ցանկացած ժողովրդի», «Արմենպրես»ի հաղորդմամբ՝ ընդգծեց Շարմազանովը: Պաշտոնական Բաքվի Լեռնային Ղարաբաղի հարցով հետաքննական մեխանիզմների ձևավորման գործընթացին ընդդիմանալը, հետքայլ է այն պայմանավորվածություններից, որոնք ձեռք են բերվել Վիեննայում,ասաց Շարմազանովը.«Վիեննայում ընդունված փաստաթղթի մեջ սևով սպիտակի վրա գրված է վստահության մեխանիզմների ձևավորման անհրաժեշտության մասին: Ադրբեջանի նախագահի այն հայտարարությունը, թե չի կարծում, որ պետք է ԼՂ հակամարտության գոտում հրադադարի խախտման մեխանիզմներ կիրառվեն, բացահայտ հետքայլ է այն պայմանավորվածություններից, որ Ի. Ալիևի և Ս. Սարգսյամի և ԵԱՀԿ Մինսկի խմբի համանախագահների հետ ձեռք է բերվել Վիեննայում»: Վերջինս կարծիք հայտնեց, որ Մինսկի խմբի համանախագահ երկրները պետք է իրենց դիրքորոշումը «ցուցաբերեն Ալիևի նման հետքայլի և մերժողական մոտեցման հետ կապված»: Վիեննայում մայիսի 16-ի ԵԱՀԿ Մինսկի խմբի համանագահաների միջնորդությամբ տեղի է ունեցել Սերժ Սարգսյանի և Իլհյամ Ալիևի հանդիպում, որի ընթացում պայմանավորվածություն է ձեռք բերվել «հրադադարի ռեժիմի խախտման հետաքննության մեխանիզմների ձևավորման» համար:
Հետևեք մեզ Viber-ում
