Մարիա Գեւորգյանը դարձավ Հայաստանի չեմպիոն

Ավարտվեց շախմատի Հայաստանի կանանց առաջնությունը: Առաջնության ավարտից դեռ մեկ տուր առաջ չեմպիոնի կոչումը նվաճել էր Մարիա գեւորգյանը: Այսուհանդերձ, վերջին տուրում էլ նա հաղթանակ տարավ Սուսաննա Գաբոյանի նկատմամբ եւ ինը հնարավորից վաստակելով 8.5 միավոր վստահ զբաղեցրեց առաջին տեղը: Երկրորդ տեղը զբաղեցրեց Աննա Հայրապետյանը, որը վերջին տուրում ոչ ոքի խաղաց Սիրանույշ Ղուկասյանի հետ եւ վաստակեց 6.5 միավոր: Նրանից կես միավորով ետ մնաց Սուսաննա Գաբոյանը: Տղամարդկանց առաջնություն ավարտին դեռ երեք տուր կա: Աղյուսակը 6.5 միավորով գլխավորում է Զավեն Անդրեասյանը: Նրանից կես միավորով ետ է մնում Ռոբերտ Հովհաննիսյանը: Երրորդ տեղում է Արման Փաշիկյանը, որը վաստակել է 5.5 միավոր: Այս տուրում Զավեն Անդրեասյանը ոչ ոքի խաղաց Տիգրան Պետրոսյանի, իսկ Ռոբերտ Հովհաննիսյանը՝ Հովհաննես Գաբուզյանի հետ: Ինչ վերաբերում է Արման Փաշիկյանին, ապա նա պարտվեց գործող չեմպիոն Կարեն Գրիգորյանից: Իններորդ տուրում Զավեն Անդրեասյանը կհանդիպի Արման Փաշիկյանի հետ, իսկ Ռոբերտ Հովհաննիսյանը՝ Լեւոն Բաբուջյանի: