Շիրակում վթարի են ենթարկվել ողջ գիշեր Արթիկում ջրհեղեղի դեմ աշխատող տրակտորիստն ու 2 ուղևորները. կա զոհ
Այսօր՝ հունիսի 25-ին, ողբերգական ավտովթար է տեղի ունեցել Շիրակի մարզում: Ժամը 05:10-ի սահմաններում Շիրակի մարզի Հոռոմ գյուղի բնակիչ, 35-ամյա Արտակ Մկրտչյանը իր վարած «Բելառուս 82» տրակտորով Արթիկ-Գյումրի ավտոճանապարհի 7-րդ կմ հատվածում՝ Հոռոմ գյուղի վարչական տարածքում, դուրս է եկել երթևեկելի գոտուց և մոտ 50 մետր գլորվել ձորը: Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով ավտոմեքենայի ուղևոր՝ համագյուղացի, 31-ամյա Գրիգոր Փարվանյանը տեղում մահացել է, իսկ վարորդ Ա. Մկրտչյանն ու ուղևոր՝ համագյուղացի, 31-ամյա Մնացական Սահակյանը մարմնական վնասվածքներով տեղափոխվել են Գյումրիի բժշկական կենտրոն: Ֆոտոլրագրողը հայտնում է, որ մահացածին և վիրավորներին առաջինը օգնության են հասել Գոռոմ գյուղի բնակիչները՝ գյուղապետ Աշոտ Պասկևիչյանի գլխավորությամբ: Դեպքի վար են ժամանել ՀՀ Արտակարգ իրավիճակների նախարարության փրկարար ծառայության Շիրակի մարզային փրկարարական վարչության աշխատակիցները՝ վարչության պետ, գնդապետ Արթուր Կարապետյանի գլխավորությամբ: Ժամանել են նաև ոստիկանության Արթիկի բաժնի օպերատիվ խումբը՝ բաժնի պետ Տիգրան Պետրոսյանի գլխավորությամբ: Վթարի մասին ՃՈ օպերատիվ կառավարման կենտրոնից տեղեկությունը փոխանցել են Հայաստանի քննչական կոմիտեի Շիրակի մարզային քնչական վարչության Արթիկի քննչական բաժին, որտեղից ժամանել է քննչական խումբը՝ բաժնի պետ Կարեն Թթուկյանի գլխավորությամբ, ում հանձնարարականով տեղում քննչական աշխատանքները ղեկավարող քննիչ Ռադիկ Մխիթարյանի կողմից հարուցվել է քրեական գործ՝ ՀՀ քր.օր-ի 242 հոդվածի 2-րդ մասի (ճանապարհատրանսպորտային պատահար, որն անզգուշությամբ առաջացրել է մարդու մահ) հատկանիշով: Քննիչի հանձնարարականով տրակտորը տեղափոխվել է ոստիկանության Արթիկի բաժնի պահպանվող հատուկ տարածք: Այն դուրս են բերել փրկարարները՝ գյուղացիների օգնությամբ՝ 2 վերամբարձ կռունկի միջոցով, իսկ կռունկների աշխատանքները դեպքի վայրում ապահովել է գյուղապետ Ա. Պասկևիչյանը: Գ. Շամշյանը հայտնում է նաև, որ մահացածն ու վիրավորները ողջ գիշեր Արթիկում հսկայական աշխատանքներ էին կատարում տեղի ունեցած արտակարգ դեպքի պատճառով, ինչի հետևանքով Արթիկում հայտարարվել էր արտակարգ իրավիճակ: Մահացածն ամուսնացած էր, խնամքին ուներ 2 երեխա:
Հետևեք մեզ Viber-ում
