Ուշադրություն՝ ձեզ հետեւում են

insecam.org ինտերնետային կայքը ամբողջ աշխարհում տարբեր տեղերում տեղադրված տեսախցիկներից ստացված տեսագրությունները հեռարձակում է ինտերնետում: Համակարգչային անվտանգության մասնագետներն, իմանալով կայքի մասին, դժվարությամբ են զսպում զարմանքը: Այս մասին հաղորդում է «Ամերիկայի ձայնը»: Ամերիկյան պետական հաստատությունների անվտանգությունն ապահովող Անդրե Մենդեզի խոսքով, տեղնոլոգիաների զարգացումը նոր հնարավորությունների հետ միասին նոր մարտահրավերներ է առաջ բերում. «Արդյունքում ունենք բազմաթիվ չափազանց հարմար եւ անհրաժեշտ նորամուծություններ եւ միեւնույն ժամանակ՝ անվտանգության հսկա բացթողումներ, որոնցից էլ օգտվում են չար նպատակներ ունեցող բազմաթիվ մարդիկ»: Մասնավոր անվտանգության ընկերության ղեկավար Թայրոն Ուիլսոնի խոսքով, առաջընթացի պայմաններում նույնիսկ անվտանգ տեխնոլոգիաները կարող են վտանգներ առաջացնել. «Հասարակ փաստ՝ դուք կարող եք տեսնել, թե ով է գտնվում տանը՝ հարձակվելուց առաջ»: Հազարավոր հեռարձակումներ ստացվում են Միացյալ Նահանգներից, Եվրոպայից եւ նույնիսկ Հայաստանից: «Այս ձայնագրությունները կարող են օգտագործվել ցանկացածի դեմ: Հատկապես՝ եթե դրանք օգտագործվում են թիրախավորված», – նշում է Մենդեզը: Վտանգն է՛լ ավելի է մեծանում, եթե տեսագրությունների տվյալները համակարգվում են քարտեզային ծրագրերի տվյալների հետ: Այս դեպքում, արդյո՞ք մենք պաշտպանված ենք. «Բացարձակապես պաշտպանված չենք», – նշում է Մենդեզը: Մասնագետների խոսքով, նոր աշխարհում մարդիկ պետք է գիտակցեն, որ յուրաքանչյուր նոր սարքավորում օգտագործելիս, նվազեցնում են անձնական կյանքի գաղտնիությունը ու նոր վտանգների ենթարկվում: