Մասնակի համաներում է շնորհվել

Ադրբեջանցի լրագրող Խադիջա Իսմայլովային համաներում է շնորհվել նրա դեմ նախկին ընդդիմադիր Էլման Հասանովի ներկայացրած հայցի գործով: Լրագրողին ազատել են 2500 մանաթ (1640 դոլար) տուգանք վճարելու պարտավորությունից, տեղեկացնում է contact.az-ը: Հասանովը, իր իսկ խոստովանությամբ, իրավապահ մարմինների հանձնարարությամբ հայց էր ներկայացրել՝ պնդելով, որ Իսմայլովան իրեն զրպարտել է՝ հրապարակելով փաստաթուղթ, որում ասվում է, թե ինքը Ազգային անվտանգության նախարարության գործակալ է: Սակայն իրականում լրագրողի հրապարակած փաստաթղթում Հասանովի անունը չկա: Այդ փաստաթուղթը համացանցում հայտնվել էր 2 տարի առաջ: Այն հրապարակել էր ԱԱՆ նախկին սպա, ներկայիս քաղաքական էմիգրանտ Ռամին Նագիեւը: Այդուհանդերձ 2015-ի փետրվարին Բինագադինի դատարանը լրագրողւն տուգանել էր: Այդ ժամանակ Իսմայլովան արդեն բանտարկված էր այլ մեղադրանքներով եւ 7.5 տարվա ազատազրկման էր դատապարտված: Սակայն ս.թ. մայիսի 25-ին Ադրբեջանի Գերագույն դատարանը խափանման միջոց կալանքը փոխարինել էր պայմանական ազատազրկմամբ: Հունիսի 21-ին Բինագադինի դատարանում Իսմայլովային հանձնել են նրա համաներման մասին փաստաթուղթը: