Արտակարգ դեպք նախկին ոստիկանապետին պատկանող ռեստորանային համալիրում․ զենքի սպառնալիքով տեղի է ունեցել ծեծկռտուք և առևանգում

Այսօր՝ հունիսի 18-ին արտակարգ դեպք է տեղի ունեցել Գեղարքունիքի մարզում։ Ժամը 00։50-ի սահմաններում ոստիկանության Վարդենիսի բաժին ահազանգ է ստացվել, որ Վանևան գյուղի «Վանևան» ռեստորանային համալիրում խուլիգանություն է տեղի ունենում, իսկ կատարողը զինված է ատրճանակով։ Ինչպես հայտնում է ֆոտոլրագրող Գագիկ Շամշյանը, մինչ դեպքի վայր կժամանեին ոստիկանության Վարդենիսի բաժնի օպերատիվ խումբը՝ բաժնի պետ Համլետ Համբարյանի գլխավորությամբ, խուլիգանություն կատարողը նախ տակն ու վրա է արել ողջ ռեստորանը, կոտրել ողջ սպասքը, գույքը այնուհետև ծեծի է ենթարկել ռեստորանի աշխատակից 51-ամյա Հրայր Ավետիսյանին։ Այդ պահին Հ․ Ավետիսյանին օգնության է հասել նրա որդին 24-ամյա Գոռ Ավետիսյանը, ով նույնպես ծեծի է ենթարկվել, որից հետո ատրճանակով զինված երիտասարդը առևանգել է նրանց։ Գ․Շամշյանի տեղեկություններով ռեստորանում՝ խուլիգանություն, անձի առևանգում, հայր և որրդուն ծեծի ենթարկելու կասկածանքով որոնվում է Վարդենիս քաղաքի Արզումյան փողոցի բնակիչ, սակայն Երևանում բնակվող 30-ամյա Ռոմիկ Մինասյանը։ Ֆոտոլրագրողի տեղեկություններով Վանևանի գյուղապետի փեսան է։ ֆոտոլրագրողը հայտնում է նաև, որ նշված ռեստորանը պատկանում է Վարդենիսի նախկին ոստիկանապետ Տիգրան Գալստյանին, Վանևանի գյուղապետն էլ նրա հետ փայատեր է։ Փաստի առթիվ Հայաստանի քննչական կոմիտեի Գեղարքունիքի մարզային քննչական վարչությունում ՀՀ քր․ օր․-ի մի քանի հոդվածներով՝ ադ թվում անձի առևանգում, խուլիգանություն, ապօրինի զենք-զինամթերք պահելու, կրելու հատկանիշներով հարուցվել է քրեական գործ։