Կալանավորվածներն ինձ ծեծողների մեջ էին. Հայկ Խանումյանը հանդիպել է Բակո Սահակյանին

Ստեփանակերտում հունիսի 6-ին ծեծի ենթարկված ընդդիմադիր պատգամավոր Հայկ Խանումյանը երեկ՝ հունիսի 17-ին, հանդիպել է Արցախի նախագահ Բակո Սահակյանի հետ՝ վերջինիս նախաձեռնությամբ: «Հանդիպման ընթացքում Բակո Սահակյանը դատապարտել է տեղի ունեցածը եւ հավաստիացրել, որ մեղավորները կպատժվեն, ինչպես որ նշել էր իր հաղորդագրության մեջ»,- NEWS.am-ի թղթակցի հետ զրույցում ասաց Հայկ Խանումյանը: Անդրադառնալով նախաքննության ընթացքին՝ պատգամավորը հայտնեց, որ դեռեւս առերեսում կամ ճանաչում չի եղել կալանավորվածների հետ: «Կալանավորված 2 եւ ձերբակալված 1 անձն այն նույն մարդիկ են, որոնց ես ճանաչել եմ ինձ ծեծողների մեջ: Տարբեր էպիզոդներում ես նրանց նախապես տեսել էի»,- ասաց պատգամավորը: Հիշեցնենք, որ իր ֆեյսբուքյան էջում Խանումյանը գրել էր, որ ճանաչում է իրեն ծեծողներից 7-ին: Ավելի վաղ հայտնել էինք, որ Հայկ Խանումյանը ծեծի է ենթարկվել հունիսի 6-ին: Դեպքի առթիվ հարուցվել է քրեական գործ Քրեական օրենսգրքի 129-րդ հոդվածի 2-րդ մասի 1-ին, 2-րդ կետերի /մի խումբ անձանց կողմից նախնական համաձայնությամբ, կյանքի կամ առողջության համար վտանգավոր բռնություն գործադրելով կամ դրա գործադրելու սպառնալիքով մարդուն առեւանգելը/ հիման վրա: ԼՂՀ Ազգային ժողովի պատգամավոր Հայկ Խանումյանին ծեծելու գործով կալանավորվել են ստեփանակերտցի կամավորներ Միքայել Միքայելի Սահակյանն ու Սերգեյ Գեորգիի Ավանեսյանը: Ձերբակալված է նաեւ երեւանցի Էրիկ Պողոսյանը: